MORA’G namilok lang ko, mitakdo naman diay og usa ka tuig, gikan sa akong paglaroy-laroy sa Hong Kong taliwala sa mga unang semana sa pagkabaniog sa Coronavirus Disease (Covid-19).
Kini lagi nga na-booking na ang ticket daan, sayang sab nga di dayunon og lupad, apan niadtong mga taknaa, dili pa kaayo kahadlokan ang maong virus kay lagi istorya palang, mao pa’y pagkabaniog og wala pa nadeklara nga usa ka pandemic.
Duol nalang ang Hong Kong sa Wuhan, kung itandi ang Pilipinas ngadto sa Wuhan diin asa naggikan ang virus. Nagpaduol gyod ko sa virus niadtong mga higayona, ug sa akong pag-uli sa Pinas sud sa usa ka semanang laag, didto na nagsugod ang makapanindog sa balahibo nga mga balita.
Ang Wuhan anaa sab China, samtang ang Hong Kong nga akong gilaagan mao sab ang Special Administrative Region sa People's Republic of China. Kami ang ulahing biyahe sa eroplano nga gikan sa Hong Kong nga motugpa sa Pinas una gipatuman ang pag-ban.
Nanghupaw ko samtang nagtan-aw sa balita, ug nianang pagka-ugma, wala ko gipa-report sa opisina, gipahimo kog 14-day self-quarantine ug pagkahuman sa 14-diyas, ako ang unang taga Davao City nga mikuha og certification sa City Health Office (CHO) aron makabalik og duty.
Hinuon wala koy nabati sa panglawas sa akong pag-quarantine. Sa pagpadulong palang nako sa Hong Kong uban sa akong kaubang maestro, nangahadlok nami, among mga bag dunay mga tabal sa flu ug daghan kaayog face mask.
Pag-abot namo sa mga kalye sa Nathan Road ug sa Victoria’s Harbour ang tanan pulos naka face mask, gibati kaayo kog kahadlok apan ang tanan natabunan kini pinaagi sa pag-amping.
Tanan nakong pictures naka-facemask ko, perteng subo-a, wa gyud makita ang smile, hahahaha. Ug tuod man, ang paghugas sa kamot ug ang di pagdikit sa ubang mga tawo ang usa sa mga pamaagi aron malayo sa Covid.
Bisan sa karon nga mag-usa na katuig ug usa ka bulan ang pandemya, unta magpabilin sa atong hunahuna ang pag-amping. Ang pagpahuway ug pagkaon sa mga masustansya nga pagkaon ang mas labing gamhanan sa pagbatok sa virus.
Unta ning maong tuig, 2021 mahitsas ang pagpahiluna sa mga vaccine, unta magpa-vaccine ang kadaghanan aron mabalik na kita sa tinuod nga normal nga kinabuhi.
Walay pugsanay ang pagpabakuna, apan sa 100 ka tawo ang gibakunahan duha lamang niini ang giingong dunay grabe nga epekto, suma sa pagtuon.
Ikaw magpabakuna ka? Kung ako inyong balihon pagpangutana, dakong YES, kay usa ako sa daghang tawo sa tibuok kalibutan nga gusto nang mabalik ang kanhi sadya kaayo nga normal nga kinabuhi, hinaut pa unta.