GRUPO sa Bangsamoro Islamic Freedom Fighters (BIFF) ang gitudlo sa mga awtoridad nga suspek sa pagpamomba sa highway sa Barangay Sibsib, Tulunan, North Cotabato alas 12:30 sa udto niadtong Miyerkules, Enero 27, 2021.
Sa maong hitabo, usa ang nakabsan sa kinabuhi nga giilang si Gina Paunon, 53, minyo, tindera og prutas, molupyo sa Barangay Cajelo sa maong lungsod.
Si Eduard (Edwardo) Odango, 53, kinsa unang gikataho nga apil sa nakalas, dakong buhi apan samaran, lakip na sila si Rodel Secur, 24, Kent Lloyd Sendero, 19, Ryan Panibayo, 28, Lorester Cojo, 25, Jake Campano, 19, ug Retchie Pedroso, 32, nga gihatud ngadto sa Southern Mindanao Medical Cente sa lungsod.
Ang improvised explosive device gipabusikad ilawom sa giabandona nga ticketing booth sa highway sa maong barangay kon diin midamay og yunit sa Yellow Bus Line, Inc. human maigo sa mga tipaka sa bomba.
Giingong naatlan lang nga mihunong ang bus sa maong dapit sa dihang dunay mikanaug nga pasahero, dungan sa pagbuto sa bomba.
Ang hitabo hugot nga gikondena nila Governor Nancy Catamco ug Vice-Governor Emmylou "Lala" Taliño-Mendoza. (Edgar E. Fuerzas)