PATAY ang usa ka bana samtang angol ang asawa human gisulong sa ilang silingan ug gipangdunggab atol sa pagsaulog sa adlaw'ng natawhan sa ilang apo didto sa Purok 3, San Roque, Barangay New Baclayon, Malalag, Davao del Sur alas 4:15 sa hapon, Miyerkules, Enero 27, 2021.
Sa taho gikan sa Malalag Municipal Police Station, nailhan ang mga biktima nga si Romeo, 62, ug Maria Roilo, 60.
Sa imbestigasyon sa pulis, nasayran nga miadto sa balay sa magtiayon ang suspek nga si Ando Labrador Cosme, 60, minyo, way trabaho.
Sa paghiabot sa suspek, gihulagway nga lango na kini sa ilimnong makahubog ug nagbinastos og istorya sa mga bisita sa magtiayon.
Gumikan niini, gibadlong ni Maria ang suspek hinungdan nga nipauli kini sa ilang balay.
Dangtan og pipila ka minuto, kalit kining mibalik sa okasyon diin armado na og kutsilyo ug gilayong gipangdunggab ang magtiayon.
Gisuwayan pa pagdala ang mga biktima sa South Davao Medical Center didto sa lungsod sa Padada, Davao del Sur, apan wa na matabang si Romeo human gideklara ni Dr. Andrew Davidad nga nakabsan sa kinabuhi.
Samtang si Maria gibalhin na ngadto sa Davao del Sur Provincial Hospital ug padayong gitambalan sa doktor.
Sa pagresponde sa kapulisan, narekober sa crime scene ang 15-pulgadas nga kutsilyong gigamit sa suspek.
Gihikay na sa kapulisan ang tukmang kasong atubangon sa suspek kinsa nagtingkagol na sa selda sa kapulisan.