SUPERBALITA CEBU

14 ka tawo nasikop sa buy-bust

Hulagway kuha ni Benjie Talisic

KATORSE ka gikatahapang mga durugista nadakpan sa managlahi nga anti-drug operation sa mga Drug Enforcement Unit sa mga police station Cebu City Police Office (CCPO) ug Philippine Drug Enforcement Agency (PDEA)-7.

Subay kini sa Synchronized Anti-Criminality Law Enforcement Operation (Sacleo) sa CCPO nga nagsugod sa Martes sa alas 12 sa kaadlawon, Enero 26, 2021.

Upat ang nadakpan sa duha ka buwag nga buy-bust sa Parian Police Station sa Barangay Carreta ug Sawang Calero, Siyudad sa Sugbo.

Nadakpan sa Barangay Carreta giila nga sila si Aladdin Villegas, 45, target sa buy-bust, ug si Jim, 17.

Nasakmit gikan kanila ang kapin sa P190,000 nga balor sa illegal drugs.

Samtang usa ang nadakpan sa Waterfront Police Station sa Miyerkules sa hapon, Enero 27, 2021.

Ang suspek giila nga si Symour Daniel Fernandez, taga Sityo Potat, Barangay Tinago, ning siyudad.

Si Fernandez nasakmitan og shabu nga mobalor og P340,000 samtang nakuhaan usab og armas.

Laing nasikop sa sityo Holy Name, Barangay Mabolo mao si Bongfat Sere, 30, nagpuyo sa dapit.

Nadakpan usab ang laing tulo pa ka mga durugista nga sila si Ernie Jacalan, 30; Glenn Villaceran, 55.

Katapusan nga naposasan mao si Mark Virgil Amamence, 26, taga Sityo Bayotan, Barangay Duljo Fatima ning siyudad.

Sila si Sere, Jacalan, Villaceran ug Amamence nasakmitan og P80,000 nga balor sa drugas.

Drug den

Samtang sa buwag nga buy-bust PDEA 7 sa Sityo Mikabaja, Barangay Duljo Fatima, unom ang nadakpan sulod sa usa ka drug den.

Lima ang anaa sa sulod nga nanuyop og shabu. Ang drug den giingong giatiman ni Edwin Diaz, 37,nangangkong paryente sa napatay nga inilang drug lord Jeffrey Diaz.

Samtang ang lima ka mga tawo nga lakip nga nadakpan giilang sila si Maria Luz Patalan, 37; Maria Viajedor, 35, taga Barangay Banilad; Renante Rupal, 45, taga Barangay Poblacion Oriental, lungsod sa Consolacion; Alberto Anoba, 36, taga dakbayan sa Mandaue; ug Albert Medalla, taga Barangay Calamba ning siyudad.

Nakuha gikan kanila ang 10 gramos sa shabu balor og P68,000.

Matod ni IA 1 Mario Portugal, team leader sa buy-bust operation, nga ang gi mintinar ni Diaz nga drug den maoy ikaduha nila nga naguba ning tuiga. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph