Napun-an ang championship collection sa gikonsiderar nga NBA greatest of all time nga si Michael Jordan apan ning higayuna, dili na sa basketball court kon dili sa usa ka fishing competition.
Ang six-time NBA champion ug six-time Finals Most Valuable Player (MVP) nibulsa og lain nga kampyonato sa dihang midaog ang iyang team sa 57th Buccaneer fishing competition sa North Palm Beach, Florida sa Estados Unidos.
Ang fishing boat ni Jordan nga ginganlan og Catch 23 milupig sa 37 ka lain nga mga barko aron harian ang duha ka adlaw nga kompetisyon.
Ang Catch 23 sa kanhi Chicago Bull gimaniho ni kapitan Stetson Turney.
Usa kini ka 80-foot convertible Viking sportfishing yacht nga nagkantidad og $8 million o dul-an sa P390 milyones.
Ang midaog sa torneyo mao ang pinakadaghang puntos nga nakuha sa duha ka adlaw nga pangisda.
Ang usa ka sailfish nga makuha gamit ang live bait mobalor og 200 puntos ug ang sailfish nga nadakpan pinaagi sa dead-bait mobalor og 300 puntos.
Mihari ang team ni Jordan human kini makatigom og 1,400 total points aron lupigon ang ilang hingpit nga karibal nga De-Bait-Able nga mipuntos og 1,200.
Si Jordan, usa ka bilyonaryo ug tag-iya sa Charlotte Hornets, nailhan nga dili magpalupig sa bisag unsa nga paugnat sa kusog.
Niining bag-uhay lang, ang 57-anyos nakabingwit og 442-pound blue marlin gamit gihapon ang Catch 23.
Sa iyang basketball career di maihap ang achievements nga nakuha ni Jordan.
Usa siya ka 5-time Season MVP, 14-time NBA All-Star, 2-time dunk champion, 3-time NBA All-Star MVP, NBA Rookie of the Year, NBA Defensive Player of the Year, 10-time scoring champion, 3-time NBA steals leader, ug uban pa.
Managlahi ang reaksyon sa netizen niining bag-ong kampyonato ni Jordan.
Ang NBA Buzz mitiaw nga 7-time champion na daw ang basketball legend human nidaog sa fishing competition.
Si John Yang mikomento nga midominar gyud si Jordan sa basketball court hasta sa dagat.
Aduna pud miingon nga mo-expand na unya ang Jordan brand o apparel ngadto sa fishing gears.
“He can do it all, basketball, baseball and now fishing,“ asoy ni Kirt Allan. / RSC