Dear Papa Joe,
Tawga lang ko og Berna, taga Cebu City ra ko ug imong avid listener sa radyo ug reader dinhi sa Superbalita. Mangayo unta ko nimo og tambag unsaon ko ning ex sa akong boyfriend nga magsige og post nga klaro kaayo nga ako ang pasaring bah. Bisan unsa na lang ang iyang gihingan nako bisan wa niya gi-mention ang akong name pero klaro kaayo.
Iya kong giingnan nga bati og nawong, gauna una sa lalake ug ala GRO. Bisan unsa na lang. Bastos usahay iyang mga post ug naglagot na kaayo ang akong family niya. Ang akong BF magsige lang og ingon nga di pansinon. Unsa kaha ang akong maayong buhaton? Ako ba ni siyang makiha, Paps?
BERNA
Berna,
Day, ang maayo nimong buhaton mao ang pag screenshot anang iyang gipang post unya ireklamo siya sa barangay aron ipatawag mo sa Lupon ug mahusay mong duha aron di na siya magpataka og post. Kon di gihapon siya mopatuo, pangayo nag document sa barangay aron mapasakaan nimo og cyber libel. Kana ra gyud ang tambal anang klaseha sa mga tawo aron magmatngon. Mas maayo nga naa kay makuha nga witness nga ikaw ang iyang gipasabot sa iyang mga post.
Naa bitaw mga tawo nga sama ana nga klaseha nga di makadawat sa nahitabo unya mobawos kay nagtuo sila nga sakto ang ilang gibuhat. Wa sila makahibawo nga sayop diay ang ilang gihimo. Ayaw lang pagbawos og post kay duha na mo nga way ayo.
PAPA JOE