Naunsa ba nga sa dihang ako nang gipadayag ang akong pagdayeg sa choreography sa mga production numbers sa Sunday Noontime Live sa TV 5, nawagtang na man hinoon sa ere.
Unsa ka tinuod nga dagko lang gyud ang mga talent fee sa direktor ug mga talents unya wa pa may nanulod kaayo nga mga commecials, mao nga alkanse gyud ang resulta, kay sa mas modako pa ang alkanse, maayo pay pagngon. Aw!
Nahinumdom mo sa nahitabo nilang Sharon Cuneta, Aga Muhlach ug uban pa nga nanglayat gikan sa ABS-CBN sa una unya wa sad magdugay kay dagko lagi kaayog talent fees.
Nakaadto ko sa Balamban niadtong Biyernes tungod sa kasal sa akong pag-umangkon nga si Xerxes S. Alkuino ug ni Ame Gatdula pagkasunod adlaw.
Syempre daghan mi nga nangadto sakay sa mga sakyanan ni Konsehal Roger Trapa ug iyang misis nga si Jodi Mae.
Nalingaw ko samtang nanan-aw mi sa FPJ’s Ang Probinsyano kay react to the max ang akong mga kauban nga sila si kanhi Kons. Caloy Luzano, Engr. Rimon Seven, Ruben Miramontes, Ritoy Doroon, Jade Aberion, Chad Trapila, Peter Aberion ug Jason Luzano.
Kadaghanan kanila nireklamo sa shooting scenes diin mas daghan og naigo si Cardo (Coco Martin) bisan kon pistola ray armas kon ikomparar sa mga hi-powered firearms sa mga pulis.
Ako na lang silang giingnan nga ayaw na lang mog reklamo.
Si Coco ang usa sa mga direktor ug syempre, di siya pwedeng patyon kay siya baya ang bida, maputol ang istorya.
Ug tuod man, bisan naigo si Cardo, nabuhi pa gihapon kini apan way swerte si Alyana (Yassi Pressman) kay nabugtuan gyud kini sa ginhawa sumala sa mga nasulat na.
Ang gwapang nawong ni Jane de Leon (ang umaabot nga Darna) ang pirmeng gi-focus sa camera agi tingali kinig pangandam sa iyang umaabot nga serye.
Pero segurado kong patyon pa gihapon kini siya inig magsugod na ang Darna. Gawas nga maglisod siya sa pagsyuting sa duha ka serye labinag lagyo ang mga location niini, maglibog sab ang mga tumatan-aw sa duha ka characters nga iyang dad-on. Anà!
Nakatayming ko sa kanhi magtiayon nga sila si Pops Fernandez ug Martin Nievera nga nag-host sa eXes & whYs with Pops & Martin sa Colours Channel.
Na-imagine nako ang panahon nga silang duha ang nag-host sa weekly show sa una nga Penthouse Live diin didto nagsugod ang ilang real life romance. Naa pa gihapon ang chemistry.
Mora lang og way nahitabo sa ila kanhing managtiayon.
Mga professional gyud.