Cebu City is ready for the vaccination program,” matod pa ni Mayor Edgardo Labella. Gi-finalize na, matod niya, sa Cebu City Vaccine Advisory Board ang vaccination plan sa Siyudad nga mag-ila sa cold chain facilities, vaccination centers ug priority list sa mga residente nga bakunahan.
Si Labella niingon nga gipangayoan na siya ni vaccine czar Carlito Galvez Jr. sa listahan sa unang bakunahan batok sa Covid-19. Unahon ang mga medical frontliners, isunod ang mga sakop sa kapulisan ug militar, senior citizens ug ang “poorest of the poor.”
Kon mao na, angay tang malipay nga ready na ang Cebu City sa pagbakuna batok sa Covid-19 kansang mga kaso nibalik pagsaka dinhi sa syudad. Ready na ta, bakuna na lang ang kuwang.
Wa pay klaro nga petsa kon kanus-a moabot sa syudad ang bakuna batok sa Covid-19 nga gigahin sa nasudnong kagamhanan sa Syudad sa Sugbo. Wa usab nganli ang bakuna ug diin kini gikan.
Si Mayor Labella, sa usa ka press conference niadtong Miyerkules, niingon nga ang Siyudad nakigsabot-sabot sa AstraZeneca ug Moderna sa pagpalit sa ilang mga bakuna batok sa Covid-19. Ang bakuna nga paliton dugang sa gigahin sa gobyerno nasyonal sa Siyudad sa Sugbo, matod niya.
Nigahin ang Siyudad sa Sugbo og P500 milyones alang sa pagpalit og bakuna. Giseguro gyud ni Mayor Labella ug Bise Mayor Mike Rama nga molusot ang maong budget. Apan sa unsang pagka-unsaa nga kita nakigsabot-sabot pa?
Ang ubang mga nasod nag-ilog sa pagpalit sa bakuna batok sa Covid-19. Ang mga nasod nga adunahan mao pay nigasto sa pag-develop sa ubang mga bakuna, busa, silay mag-una nga makakuha niini.
Apan nganong ang ubang mga siyudad nakapirma na man og kontrata sa AstraZeneca? Sa listahan nga napublikar niadtong Enero 13 pa, miabot na sa 30 ka mga probinsya ug syudad ang nakapirma og kontrata sa pagpalit og bakuna gikan sa maong kompaniya.
Wa malakip ang Cebu City sa maong listahan. Klaro na lang, kay matod pa sa mayor, nakigsabot-sabot pa man ang Siyudad. Sa madugay ug sa madali, moabot ra gihapon ang bakuna. Sa kasamtangan, padayon ta sa pag-amping.