Maayo gani kay gibaraw ni Presidente Rodrigo Duterte ang desisyon sa Inter-agency Task Force for the Management of Emerging Infectious Diseases (IATF) nga tugutan na ang 10 ngadto sa 14 anyos nga makagawas na sa ilang mga pinuy-an sa mga lugar nga gipaubos na sa modified general community quarantine (MGCQ). Ang tibuok Lalawigan sa Sugbo apil na ang mga independent ug highly urbanized cities ubos sa MGCQ.
Gisalindot ni Pres. Duterte ang maong desisyon sa rason nga naghamok na usab karon ang bag-ong Covid 19 United Kingdom (UK) variant. Adunay mga bata nga natakbuyan sa maong kagaw didto sa Bontoc, Mountain Province. Base sa mga pagtuon nga kasagaran sa mga natakbuyan sa Covid 19 mga bata ug tiguwang gumikan sa kahuyang sa ilang immune system.
Para nako mas maayo kining nakab-ot nga desisyon sa Presidente nga dili una tugtan ang kabataan nga makagawas-gawas kay namiligro ang ilang panglawas. Nganong mosugal man ta? Bahala nag maburyong ang kabataan nga anaa lang sulod sa balay kay sa atong makita sila nga natakbuyan sa maong balatian. Risgo sa kabataan ang maong desisyon.
Adunay nag-ingon: “Ang mga kahigayonan o opurtunidad kinahanglan nimong sukdon sa mga risgo nga susamang sukdanan nga nahisakop niini.” Buot ipasabot nga sa bisan unsa nga oportunidad anaa ang mga risgo nga atong pagaatubangon. Susama sa atong pagtuon sa mga peligro ug risgo kon pagawason na ang mga bata nga ania pa kining hulga sa Covid-19.
Unya ato dayon kining itimbang sa unsa ang mga kaayuhan nga atong ma-angkon taliwala sa mga kakuyaw. Kon makagawas na ang mga bata, makatabang kini nga mabuhi pag-usab ang atong ekonomiya. Mao kana ang risgo ug opurtunidad nga atong gipasabot? Ug kining pagtimbang-timbang o pag-assess sa situwasyon ug mga sirkumtansiya ato nang gitugyan sa mga kamot sa atong kagamhanan labi pa ngadto sa IATF.
Pero ang una nilang plano morag ilang gilawog sa tirong ang kabataan. Kay gamay lang sipyat, dakong disgrasya ang dangatan sa tanan. (bobbygnalzaro@gmail.com)