Upat ka traffic enforcers ang positibo sa gidiling drugas atol sa surprise drug test sa mga kawani sa Traffic Enforcement Agency of Mandaue (Team) Enero 13, 2021.
Matod ni Atty. John Eddu Ibañez, ang executive secretary ni Mandaue City Mayor Jonas Cortes ug ang focal person sa City Anti-Drug Abuse Council (Cadac), ang upat nga nagpositibo ipaubos pa sa confirmatory testing aron masuta kung mogamit ang maong mga kawani sa gidiling drugas.
Duha ka semana, ang milabay adunay 200 ka mga kawani sa Team ang gipaubos sa surprise drug test nga gipahigayon sa Cadac.
Matod ni Ibañez, kon madawat na ang confirmatory result gikan sa Manila, ang kawani nga magpositibo gihapon, pahamtangang og sanction.
Alang sa job order, dili na i-renew o ikanselar na ang kontrata sa maong empleyado human mahibaw-an nga positibo sa paggamit og gidiling drugas.
Alang sa mga regular, aduna pa silay proseso nga sundon sa drug-free workplace ordinance sa dakbayan.
Tungod ang upat positibo, gipaubos pa sa confirmartory testing, sigon ni Ibañex, nga i-hold una nila ang mga pangalan niini.
Gawas sa upat, adunay duha ka mga kawani sa Team nga nagdumili sa pagpaubos sa maong drug test hinungdan nga wala na gi-renew ang ilang job order.
Hangyo ni Ibañez nga dili musulod og mga ingon ani nga bisyo labi na nga ilang trabaho ang pagserbisyo sa publiko. / KFD