Negusyante sa Dakbayan sa Sugbo gidakop sa Anti-Cyber Crime Unit (Racu-7) pinasikad sa warrant of arrest nga giluwatan sa korte sa kasong cyber libel nga gipasaka ni Office of the Presidential Assistant for the Visayas Secretary Michael Dino.
Gipusasan si Santiago Estallila Go, 44, taga Barangay Banilad, Cebu City dihang gisikop sa Miyerkules sa hapon, Enero 27, 2021 pinasikad sa warrant of arrest nga giluwatan ni Judge Ramon Daomilas sa Regional Trial Court (RTC) 7 Branch 11 sa kasong cyber libel.
Matod ni Police Lieutenant Colonel Artemio Ricabo, hepe sa Racu 7, nga nakadawat sila og kopya sa warrant of arrest sa akusado gikan sa korte hinungdan nga ilang gipanid-an.
Nasigpatan si Go nga nipauli sa ilang balay.
Ila kining giduol ug gipahibawo dayon nila si Go nga naa siyay warrant of arrest nga giisyu ang korte.
Hulyo 3, 2020 si Go nipublikar sa Viber chat group sa “Golfers Farm-Cebu Country Club” diin giingong iyang giakusahan si Dino nga nibaligya sa PCR machine test kits ug ubang Covid materials nga gidonar ngadto sa buhatan sa Opav ug foundation sa iyang mitaliwan nga inahan nga Christina Lee Dino Foundation, ngadto sa Kagamhanan sa Siyudad sa Sugbo.
Adunay nipakita kang Dino sa screenshots sa mga pasangil ni Go sa Viber group ug maoy gihimo nga ebidensya ni Dino.
Nangita og paagi si Dino nga mahinabi si Go pinaagi sa mga higala niini aron agnihon nga mohimo og public apology.
Nagpaabot pa siya sulod sa usa ka buwan apan wala, hinungdan nga siya nakahukom sa pagkiha.
Nidangop si Dino sa National Bureau of Investigation (NBI) 7 aron ireklamo si Go.
Matod ni Dino nga siya nasakitan kay giduhig ang ngan sa iyang namatay nga inahan nga maoy gingalan sa foundation.
“Every deceased mother anywhere in the world has the right to be protected from defamation. And it’s a Christian obligation of all sons and children of the world to protect the precious image of our mothers,” matod ni Dino sa iyang giluwatan nga pamahayag.
Nagdumili na sa pa luwat sa iyang pamahayag si Go sanglit adto na siya motubag sa korte uban sa iyang abogado.
Ang hitabo, matod ni Ricabo, magsilbing leksyon sa tanan nga adunay account sa tanang social media nga kinahanglan nga mag-amping kon unsay i-post nga makadaot sa reputasyon sa laing tawo sanglit mahimo kining gamiton batok kanila.
Sa tanang kaso nga gihuptan sa Racu 7 nag una pa gihapon ang cyber libel tungod kay mao kini ang labing dali nga mapasaka sa korte. / AYB