GIKUSTODIYA na sa Davao City Social Welfare and Development Office (CSWDO) ang duha ka tuig nga batang lalaki human gimartilyo sa inahan kay sabaan.
Ang inahan ning kasamtangan anaa sab sa pagkustodiya sa Women and Children Protection Desk (WCPD) sa Buhangin Police Station samtang nagdagan ang imbestigasyon sa hitabo.
Sumala ni CSWDO Department head Atty. Marlisa Gallo nga posibleng nakasinati og postpartum depression ang inahan sa biktima, hinungdan nga nahimo niya ang pagmartilyo sa iyang anak.
Nasayran nga niadtong higayona, ang inahan nagbantay sa iyang usa ka tuig nga anak nga natulog samtang ang duha ka tuig nga bata nagsaba-saba kini.
Wala kaantus ang inahan mikuha kini'g martilyo dayon gimartilyo ang baba sa 2 anyos niyang anak.
Maayo nalang nga nakita sa mga silingan ug naka-report dayon kini sa barangay, hinungdan nga giadtoan sa awtoridad ang ilang balay ug gi-rescue ang 2 anyos.
Ang mga kabanay sa babaye maoy temporaryo nga miatiman sa usa ka tuig nga bata samtang ang bana niini nangita og panggatas niini.
Nagpahinumdom ang CSWDO sa publiko nga gilayong mo-report sa awtoridad ugaling dunay masayran nga ingon niini nga pangabuso sa kabataan.