Milingkod na sa Enero 20 ang ika-46 nga presidente sa Amerika nga si Joe Biden ug iyang Bise Pres. Kamala Harris taliwala sa hulga sa armadong protesta. Si Biden mikawhat sa 75 million popularity votes ug 290 electoral college votes. Naparot si Pres. Donald Trump apan wala mogakos sa iyang kapildihan.
Natakdan sa kagaw sa Pilipinas. Enero 6 mga dumadapig ni Trump mimartsa sa US Capitol aron pagpahunong sa kongreso pag-aprobar sa kadaugan ni Biden misangpot nga dugoon kay lima ang patay sa nahitabong riot. Gi-impeach si Trump sa US congress nga nagtisok og kagubot.
Gitataw nga nakatampo sa kaparotan ni Trump ang iyang pagkahimalikas, aroganti, pagtinil og kasilag nga wala mohaom sa disenting mga Amerikano ug ang dili maayong pagdumala sa pandemya.
Niadtong paglingkod ni Trump, 40 porsiyento ra ang trust rating nga sa unang adlaw gisugat ug halapad nga ptotesta Women’s Marches nga gisalmotan sa 3.5 milyunes kayy wala mauyoni ang agenda paghulip sa Obama Health Care. Dili ganahan sa mga Black Americans. Gihinginlan ang mga Fil-Ams nga walay klarong papeles ug Pinoy illegal immigrants. Gihulagway ang mga Pilipino nga hayop gumikan sa presensya sa mga terorista.
Kadaugan ni Biden nagsagubang og mga hagit pag-alim sa garas sa pagkabahinbahin ingon man pagpapas sa kasilag. Nanawagan sa panaghiusa tali sa Republicans ug Democrats. Tumong ang paglig-on sa nasod, pagpahiuli sa ekonomiya, pag-ayom sa samad sa politika aron mahibalik ang tiunayng tigbayon sa Amerika.
Si Bise Pres. Harris maoy unang babaye nga nakahupot og taas nga posisyon. Mihulagway sa nasod sa mga posibilidad nga duna pay mosunod kaniya. Tinguha nga mawagtang ang diskriminasyon, kaangayan diha sa trabahoan, pagpakabana sa panglawas ug pag-usab sa kinaiya ngadto sa kababayen-an.
Dinhi sa Pilipinas walay mausab sa gitagkos sa diplomatikanhong relasyon tali sa Amerika. Sila si Trump ug Pres. Rodrigo Duterte sama og taras apan lahi og pagbati sa natad sa pangalagad.