ANG pagbatok sa Covid-19 maoy mas importante alang kanako. Karong naa nay bakuna, mao unta kini ang unahon sa atong mga lider. Kay kon mabakunahan ang mayorya sa populasyon, mas molambo ang ekonomiya.
Mabuhi ug molambo ang ekonomiya kay di na man kita mahadlok matakdan motrabaho. Di na kita mahadlok mogawas aron mangumpra ug mangaon sa gawas. Pwede na ang face-to-face nga pagtungha. Di na mahadlok ang mga investor mismo nga mobubo sa ilang kwarta. Mobalik ang mga turistang langyaw.
Apan daw lahi ang prayoridad sa atong mga lider.
Imbes pangpalit og mga tarong nga bakuna, dako kaayo ang national budget alang sa intelligence fund. Ug nakita nato unsay produkto sa atong mga intel officers. Naay listahan sa giingong graduate sa UP nga nadakpan o napatay kay kuno NPA. Apan nasakpan nga pataka lang diay ug gitaktak na ang intel chief.
Klarong hinanggaw gyud nga listahan. Apil ang usa ka abogago nga nisang-at og kasong nikwestyon sa Anti-Terrorism Law diha mismo sa Korte Suprema. Naay mga sakop sa media sama ni Roel Landingin ug si Bobby Coloma nga bureau chief sa Agence France Presse (AFP) sa Singapore. Apil pa ang namatay na nga sikat nga direktor nga Behn Cervantes.
Imbes hapsayon ang pagpalit og bakuna ug ang proseso sa pag-apod-apod unya niini, oi unahon man hinuon ang cha-cha kun charter change.
Ang pasangil sa cha-cha mao ang pagpalambo sa ekonomiya. Mas mo-invest daw ang mga langyaw. Apan bisan unsaon pa na nila og retoki sa Konstitusyon, di man mo-invest ang mga langyaw kon nagkuyanap pa ang Covid-19. Mao nga angayang ang bakuna unta ang giuna.
Dinhi sa Sugbo, mas nabalaka ko sa baruganan ni Gob. Gwen Garcia. Samtang ang mga tiguwang sa kaulohan magpaaron-ingnon pa nga importante ang bakuna, ang gobernadora sa Sugbo klaro ang baruganan.
Alang kaniya, ang pagsaka sa mga kasong Covid- 19 dinhi sa Sugbo “not a cause of concern.” Mas angay nga tutokan ang pagpabuhi sa ekonomiya. Ambot, mabuhi man ang ekonomiya unta kon masulbad ang Covid-19.
Mas nabalaka ko sa Syudad sa Sugbo. Mao kini ang syudad diin si Mayor Edgar Labella namugos gyud nga inagurahan ang Cebu City Medical Center (CCMC) sa miaging Disyembre 28, 2020. Bisan og tulo ka andana lang kuno. Makasugod na OPD kun Out-Patient-Department anha sa bag-ong building inig sunod dayon.
Apan unsang pagka-unsaa mayor nga milabay na lang ang usa ka bulan, wa pa man gyud diay mag-operate ang maong hospital?
Unya, imbes pagpalit og bakuna, giuna nimo ang kontrata sa Megawide alang sa pag-privatize sa merkado sa Carbon.(@anol_cebu sa Twitter)