Usa sa akong mga higala nga suod, si Alan Salazar nga nagtrabaho kanhi sa Habagat, mi-migrate na ngadto sa United States pipila ka mga tuig na ang nakalabay. Unya ni chat siya nako aron makita ang bike trail nga accessible nila. Kapin sa 100 ka kilometro nga bike trail nga tumbas sa duha ka lanes ang gilapdon sa sakyanan sa atoa.
Imajina lang gud kon unsa ka taas unya alang lang sa biseklita, way bisan usa ka four-wheeled nga sakyanan. Ingon niana kaanindot ang ilang bike trail. Kinsa man nga biker ang di ganahan nga mosikad kon ingon niana ang imong subayon? Sa akong nakit-an, duna pay portion nga naa daplin sa sapa.
Ang ilang trail dunay mga kahoy nga naa daplin sa dan. Kaanindot kon naa pa tay ingon niani sa Pilipinas. Makaguol kay bisan sa ordinaryong mga tawo wa makasabot sa kaanindot kon dunay igong kaagian nga luwas ang mga magbiseklita.
Nindot ang sinugdanan sa pagpamutang og bike lanes, apan gikinahanglan ang pag-edukar usab sa publiko. Makaguol usab kay way makaedukar sa public kay bisan ang Sugbo Bike Board nga gipangulohan ni manlalaban Gerry Carillo wa maka engage sa public. Sa panahon ni Bise Mayor Mike Rama dihang siya pa ang mayor, kaming mga biker ug organized nga mga grupo imbetaron man. Karon wa na ko makadungog nga dunay giimbetar.
NAG-MTB
Nagkita mi sa akong dugay na kaayong higala nga si manlalaban Jose Neil Nuñez human sa duha ka dekada. Sa Facebook ra mi magka update. Sa Bulacan na diay sila nagpuyo sa iyang asawa nga si Lourdes. Higala na mi Neil sukad sa college pa siya nagtungha, sa University of San Carlos.
Wa ko makahibawo nga nag bike usab diay siya ug mas taas pa ang klase sa iyang frames kaniadto kay sa akoa. Sa YKK sa dan Legaspi siya magpalitan ug tigpa assemble.
Apan nagpugong siya sa paggasto og dako. Kon kaniadto maigo ra ang iyang budget nga P70,000, karon di na siya matagbaw sa set-up. Nipalit siya og Jamis nga frame, apan gikinahanglan pa niya i-upgrade.
Di lang siya ang nag bike, kon di ang lain namong abogado sab nga higala, Atty. Renato Galeon. Si Galeon maoy naghupot sa akong tulo ka mga kasong libel kaniadto. Makaguol pud kay di pa ko makakuyog nila tungod kay nag-antos pa ko sa eczema.
UPGRADE
Matod ni Neil nagplano na siyang mo-upgrade sa iyang groupset. Ako siyang giingnan nga dunay pamaagi nga siya makadaginot. Mopalit siya og slightly used nga parts kay maoy akong sekreto aron ko makadaginot. Apan kaniadto ra kay karon di na man ko makalugar tungod sa ka busy.
Niadtong 2012, nipalit ko og Giant nga frame. Ako lang gihinayhinay og upgrade ang parts hangtod nga ang akong anak nga babaye mao na ang tigdala.
Diha pa siya naka appreciate sa akong mga gasto kaniadto kay di man mabitin ang iyang bike bisan sa iyang gibug-aton.
Busa, kon mo-upgrade ka man gani sa biseklita, pangutana sa mga rider nga duna nay experience aron ka magiyahan. Sa una, nagkapa-kapa sab ko unsaon pag-uprade until nakat-on ko sa pag research ug pagpangutana sa mga higala.
Seguraduha nga ang imong upgrade di downgrade kay nipalit ka sa di kasaligan nga part, sama sa fork. Wa ra ba ta mamunit og kwarta alang sa biseklita.