GIDILI na ang pagbaligya ug pag-supply sa buhi nga baboy, ilabi na ang anay, gikan sa Sugbo paingon sa ubang bahin sa nasud sugod sa Lunes, Pebrero 1, 2021.
Tumong niini aron di magkuwang ang supply sa karneng baboy nga gikinahanglan kaayo sa mga Sugboanon ning pagdili sa pagsulod sa mga karne gikan sa Luzon ug ubang dapit tungod sa African Swine Fever (ASF).
Kini maoy bag-ong kamandoan ni Cebu Governor Gwendolyn Garcia nga nalatid sa iyang Executive Order No. 8, may labot sa pag proteher sa lalawigan sa Sugbo batok sa ASF.
Ang lakang natukma usab sa kakuwang sa supply sa baboy, labina sa Metro Cebu nga nisangko sa pagsaka sa karne sa baboy matag kilo, gikan sa P80-P100.
Matod ni Garcia nga ang maong lakang gibuhat aron mabalanse ang gipanglantawan nga kakuwangon sa supply sa Sugbo.
Subay sa taho sa gobernador, moabot sa 4,400 metriko tonelada nga supply sa baboy ang gikinahanglan matag buwan.
Kon saligan lang ang lokal nga suppliers, moabot sa 2, 270 metriko tonelada lang ang ilang ma supply.
“Ang mahitabo ani, wa nay manggawas nga trucks nga live hogs for six months usa. Kay ako man gud, the possible shortage of pork in the market. Prices will skyrocket, worse kita na’y walay supply. So six months until mo stabilize ang market,” matod ni Garcia sa mga tigbalita sa Enero 29.
Aron masiguro nga dunay igong supply ang mga Sugboanon sa lalawigan, di pwede nga mobaligya og anay sa laing lugar.
Hinuon gitugot ang pag ihaw sa anay kon unproductive na o ba kaha masakiton ug di na makapanganak.
“Ako mas nahadlok ko sa ASF kay though they though not saying its not harmful to humans, but kanang foamites ba kanang bacteria anaa mamilit pilit ana. maka-hibernate pa gyud. Murag ma reactivate. Lisod kaayo pagpatay, you had to have 100 degrees heat pagpatay ana,” matod ni Garcia.
Niadtong Biyernes, Enero 29, 2021, si Cebu City Department of Veterinary, Medicine and Fisheries (DVMF) head Jennifer Laurente niingon nga ang mga presyo sa karneng baboy sa kamerkaduhan sa Dakbayan sa Sugbo nisaka og P80 to P100.
Matod ni Laurente nga sa una, ang mga presyo sa karne sa baboy naa lang sa P160, apan karon niabot na og P280.
Sa mga mall, nabantayan nga duna nay niabot og P300 matag kilo.
Matod ni Laurente nga ang panginahanglan sa baboy sa siyudad nagpabilin nga taas, apan ang supply niminos tungod sa restrictions dala sa ASF.
Ang mga supplier gikan sa Negros nga maoy kuhaanan sa Sugbo toa na sa Luzon namaligya kay mas mahal ang palit.
GIDILI
Sa Enero 15, gidid-an na sa pag-transport og baboy sa Sugbo ang mga trucks nga gikan sa Mindanao, Luzon, Rehiyon 8 ug mga apektadong rehiyon.
Subay niini, ang accredited nga truckers lang gikan sa Sugbo ang mahimong mo deliver sa baboy sa ubang probinsya pinaagi sa drop off point.
Ang accredited truckers na maoy mohatod sa mga baboy ug sugaton sa trucks sa mga pantalan kutob sa Matnog Port sa Probinsya sa Sorsogon.