MAGSUGOD na unya ang konstraksyon sa 39.88-kilometro nga Bus Rapid Transit (BRT) sa unang semana sa Abril ning tuiga.
Si Cebu City Councilor James Anthony Cuenco, tsirman sa komite sa transportasyon sa Konseho sa Dakbayan sa Sugbo, nagbana-bana nga mahuman sa Pebrero ang bidding kon kinsa ang mo-construct ug i-award na unya dayon sa Marso.
Si Cuenco niingon nga ang first phase sa BRT, diin magsugod sa Cebu South Bus Terminal (CSBT) padung sa Cebu Provincial Capitol, ang unang pagabuhaton.
Ang unang pagabuhaton sa first phase mao ang pagtukod sa mga imprastraktura sama sa bus terminals.
Sa Disyembre ning tuiga, gipanglantawan nga partially operational na ang first phase.
Apil sa preparasyon sad sa first phase sa BRT mao ang pagbalhin sa 228 ka mga kahoy nga maapektuhan sa rota.
Sa suwat gikan ni Engineer Editha Peros, pangu sa Cebu City Environment and Natural Resources Office (Cenro), ngadto kang Konsehal Joel Garganera, ang Cenro mirekomendar nga magpasar og resolusyon nga “interposing no objection” para sa pag earth-ball sa maapektuhan nga mga punoan.
Ang apektado nga mga kahoy naglakip sa Indian trees nga 225 kabuok ug adunay tulo nga Ficus trees.
Gitataw ni Peros sa iyang suwat nga ang pito ka mga barangay kon diin nahimutang ang mga kahoy nagpada na sa iyang buhatan og “no objection” alang sa pag earth-ball sa mga kahoy.
ASA ANG KAHOY?
Ang mga kahoy nahimutang sa Barangay San Antonio, Pahina Central, Sambag 1, Kalubihan, Capitol Site, Sta. Cruz, ug Sambag 2.
Gi-refer ni Garganera ngadto sa budget office ang maong suwat para ipatan-aw ang status sa pundo para sa pag-earth-ball.
Matod niya nga mura og adunay P30 milyones nga budget alang sa pagbalhin sa mga kahoy.
Si Cebu City Councilor Nestor Archival miingon nga kinahanglan nga mokunsolta sila og mga eksperto una pa pagahimuon ang pag-earth-ball.
Matod ni Archival nga adunay “proper process” sa pag earth-ball.
Matod ni Cuenco nga gitan-aw sad nila kon asa nga mga lugar nga mamahimong ibalhin ang mga kahoy ug para masiguro nga matanom kini pagbalik.
“So we may preserve the dignity of the trees that were being earth-balled,” segun ni Cuenco.
Karon nga napahimutang na ang sa first phase, giandaman nasad sa mga opisyal ang second phase sa proyekto nga modagan gikan sa Barangay Bulacao padung sa Talamban.