SUPERBALITA DAVAO

Genoguin: Ang pag-amenda sa Constitution

Kontra Balanse

MGA mabuot nga magbabasa sa atong kulom KONTRA BALANSE kumusta man mo? Tingali gibati mo'g dakong katingala nangong kalit lang kitang nawala sa atong kulom nga walay pagpananghid sulod sa usa ka bulan ug tunga.

Makaliton ang mga panghitabo, sa sobra natong pag-amping ug kanunay nagpahimangno sa atong programa sa radyo nga mag-amping ug sundon ang mga protocols nga gilusad sa atong gobyerno, kita pa gyud ang nabiktima ug ang nakaparat kay dili nato ma-recall kon diin, asa, nako nakuha ang Covid-19 nga mitakod nako.

Dako ang akong pagtuo nga gikan sa mga restaurant nga ako kanunay'ng kan-an inig kahuman sa akong programa bag-o mouli sa balay, kay laay man kon modiretso ka'g uli gikan sa board time. Pero karon, gikan sa balay, station na; gikan sa station uli sa balay, bahala'g laay kay nakasinati na'g tagam.

Salamat na lang sa atong Diyos nga gamhanan, naka-survive ta, tingali kay lig-on ang atong immune system. Mao nga kon wala man lang ta'y tuyo sa gawas, mas maayong magpundo na lang sa balay aron walay mahitabo sa ato samtang ania pa kining Covid-19 pandemic.

Karon diri kita sa atong pagpakabana sa mga isyu ning panahona. Gusto sa atong pangulong Rodrigo Roa Duterte nga amendahan ang duha ka provision sa atong Batakang Balaod nga mao ang economic ug party-list system.

Karon diri kita motutok sa party-list tungod kay adunay punto ang atong presidente nga wad-on kini sa atong Batakang Balaod tungod kay pinaagi ini, nasudlan og mga kongresistang komunista ang atong Kongreso ug kini mao ang Makabayan bloc kay klaro man sad ug dili ikalimod kay giangkon man kini ni Jose Maria Sison, ang Bayan Muna, Gabriela, Alliance of Concern Teacher, League of Pilipino student Anak Pawis ug uban pa.

Bisa'g unsaon nila'g limod, mosamot ang pagtuo sa katawhang Pilipino tungod kay bisa'g asa ang mga kasaulogan sa New People's Army (NPA) makita man ang ilang dagway didto ug ang lig-ong mga testimonyo sa mga cadres nga nagbalik gobyerno na.

Duna la'y problema dinhi, kay dili nimo ma-single out ang Makabayan bloc nga mao lang ang mawala, kon dili tanang mga party-list nga dili iladong komunista mawala na sa atong Batakang balaod. Kana lagi, kon himuong priority sa atong mga congressmen ug senador.

Gikan karong adlawa, Pebrero 1, 2021, 17 ka bulan na lang ang termino sa atong presidente, maayo unta ug hatagan og priority sa duha ka balay balauranan nga matuman ang katapusang panaad sa atong presidente nga mag-Federal kita bisan kon idungan na ang plebesito niini sa 2022 National and Local Election.

Revolutionary government daw ang katapusang paglaum, pero, kon mahitabo kana, adunay dakong hinungdan kon nganong mag- revolutionary government kita. Pero kon pag-usab lang sa atong Batakang Balaod himuon kini sa atong presidente, atong ipangutana ngadto sa mga eksperto. Pero nakaseguro kita nga mas daghan ang gustong mag-Federal, tungason lang kaayo ang paghimo niini, gumikan sa mga personal interest.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph