GITAKDANG mogahin og inisyal nga pundo nga kantidad P50-milyones alang sa pagpalit og Covid-19 vaccine pinaagi sa first supplemental budget ang lokal nga panggamhanan sa Digos City.
Samtang gibutyag sab ni Mayor Josef Cagas nga ugaling moabot na ang bakuna sa dakbayan, siya mismo ang unang magpaturok niini.
Gumikan niini, giawhag sa mayor ang katawhan sa dakbayan nga dili mahadlok magpabakuna tungod kay adunay pagahimuong vaccination plan ug screening process aron maseguro nga luwas ang maong bakuna.
Si Cagas nagklaro nga ang mga component cities mahimong makapalit og bakuna gikan sa badyet nga P20 ngadto P60 milyones, apan P50 milyones lamang ang gigahin sa siyudad tungod kay nasayran niya nga manghatag sab og libreng vaccine ang nasyonal nga gobyerno.
Hinuon, gitin-aw niini nga wala gi-obliga sa nasyonal nga gobyerno ang mga lokal nga kagamhanan sa pagpamalit og bakuna apan nakita niya nga aduna na'y 20 ka mga siyudad ang migahin og pundo alang niini.
Alang niya, nga mas maayong mohatag sab sila'g ayuda sa nasyonal nga kagamhanan aron matuman ang tinguhang "We Heal as One."
Gitataw sab sa mayor nga ang AstraZeneca maoy ilang napili nga palitong bakuna sanglit kini sab ang gi-order sa 20 ka mga siyudad.
Mao nga kung maaprobahan na ang ilang P50-milyones nga badyet alang niini, mosulod na og kontrata ang dakbayan alang sa pagpalit sa bakuna sama sa gihimo sa siyudad sa Davao.
Si Cagas nagklaro nga ila sab pahibaw-on ang kagamhanang probinsiyal kung pila ang ilang paliton nga bakuna subay sa Department of Health guidelines.
Wa pa gibutyag sa mayor kung kinsa ang mahimong unahon sa pag-bakuna apan nasayran nga apil sa turukan ang mga frontliners ug way pagapilion sa paghatag sa libreng injection kon magparehistro na ang matag indibiduwal kung mouyon sa gitakdang proseso.