ALANG kang Gobernador Gwendolyn Garcia, kinahanglan nga unahon ang pagtambal sa kagutom kay sa pagkombate sa Covid-19. Matod pa sa gobernador, kon mapasagdan ang kagutom sa katawhan, mosaka ang mga krimen ug mas modako ang suliran.
Ang dakong problema, matod sa gobernador, nga daghan na unya kaayo ang mga tawo nga gigutom ug kon ang gutom mosaka na sa utok, mosaka sa krimen ug ang kagubot sa kadalanan.
“Mao na nga naningkamot gyud ko nga matabangan gyud ni ang atong mga kaigsuonang Sugboanon nga mabuhi ning atong ekonomiya nga labihan na gyuyng gubaa tungod lang sa Covid-19,” matod ni Garcia.
Bitaw, makapangutana kita, pila man ang nangamatay sa Covid-19 kon atong ikomparar sa ubang mga sakit? Nganong man giatiman man nato ang Covid-19 kay sa ubang mga sakit nga mas daghan ang nangamatay?
Ang Octa researchers niingon nga subay sa ilang pagtuon, kinahanglan nga seryusohon ug hatagan og dakong pagtagad ang pakigbatok sa Covid-19 ilabi na sa nakitang pagtaas sa mga kaso dinhi sa siyudad ug lalawigan sa Sugbo.
Sa uwahing report sa Department of Health (DOH) - 7 sa Enero 28, adunay 614 ka mga aktibong kaso ang lalawigan sa Sugbo, may 6,704 na nga naka-recover sa moabot 7,744 ka mga kompirmadong kaso sukad sa pagsulbong sa sakit.
Ang tanang panan-aw nakapunting sa Covid-19. Apan matod sa gobernador, ang gidaghanon sa gitakdan mas mubo kon itandi sa populasyon sa lalawigan nga moabot sa 3.2 milyones.
Matod niya, mas daghan pa ang namatay sa tubercolosis (TB) kay sa Covid-19, bisan pa kon ang TB preventable ug curable kay naa nama’y bakuna, naa namay tambal sa TB. Naay bakuna batok sa Covid-19 apan wa pa ta kahibawo kon kanus-a moabot sa Pilipinas.
Tingali nakahibawo ang gobernador sa ginaingon sa katiguwangn nga way namatay sa gutom. Matod pa niya daghan sa atong kaigsuonan naglisod dili tungod sa Covid, dili tungod kay nag-lisud og ginhawa, tungod sa Covid nag-lisud og ginhawa kay wa nay gikaon.