KON nahinumdum pa mo, pagbukas sa Pebrero sa miaging tuig, nagkaseryoso ang hilisgutanan sa Covid-19 dinhi sa ato. Ang dili nako malimtan mao kadtong tapoktapok matag Martes diin akoy gitahasan nga coordinator sukad nga kini among gipasiugdahan niadtong 2019. Paagi ni nga nagkakitakita ang mga karaang higala, nga tungod kay ni-retire na ang uban, di na igkita matag adlaw.
Kasagaran ang tapoktapok magsugod sa kapihanan ni Pedring sa sidewalk sa Fuente Osmeña Rotunda. Unya adto ni mosangko sa kan-anan kon makompleto na ang grupo. Kay matag Martes man ang tapoktapok, nagkadaiyang isyu ang among saw-an. Gikan sa pulitika, sports, negosyo apil na gani ang kinabuhi sa mga artista.
Apan, sa unang Martes sa Pebrero sa miaging tuig, usa nalang ka topic ang among gibanosbanosan og tuki. Kini mao ang Covid-19 nga nag-uros uros didto sa Wuhan, China. Tayming kay usa sa among kauban bag-o lang nakapauli gikan sa Hong Kong. Nisamot ka nindot ang diskusyon basi sa iyang kasinatian didto. Hinumdumi nga sa maong panahon gawasnon pa nga makatugpa sa Mactan Airport ang mga ayroplano gikan sa China.
Gawas sa among grupo, may niabot nga bisita. Siya mao si Konsehal Dave Tumulak nga niadtong higayona nagdala na og face shield. Nisamot kainit ang diskusyon mahitungod sa Covid-19. Ang dili nako malimtan nga estorya mao ang gipadayag ni Atty. Thads Bentulan. Siya ang akong giingon nga bag-o lang naabot gikan sa Hong Kong.
Matod niya, kon dili matarung og dumala ang pandemiya, mahugno ang ekonomiya ug dakong gutom ang masinati sa katawhan. Iyang gipaambit ang gihimo sa gobyerno sa Hong Kong. Way lockdown nga gipatuman. Padayon nga nagtrabaho ang mga tawo.
Hinuon may mga estabilisemento nga gipasirad-an, apan ang mga tindahan, pabrika ug ubang balay patigayon padayong gibalikbalikan sa mga trabahante.
Ang public transportation wa mohunong sa pagbiyahe.
Hilabihan ka seryoso sa isyu nga among gisaw-an. Bisan kon nanguli na ang uban sama ni Leo Lastimosa kay may TV Patrol pa siya nga atimanon, padayon ang paghisgut sa Covid-19. Ang iyang kabangis didto sa Wuhan ug ang dakong posibilidad nga manghasi kini dinhi sa Pilipinas, gibalikbalik pagtuki.
Sa iyang bahin si Konsehal Dave, nisaysay sa mga pagpangandam sa Cebu City Hall labot sa maong isyu. Samtang nagtabi si Konsehal Dave, naghawid ko sa face shield nga iyang dala. Gisulayan pa gani nako og sul-ob. Kinsay magtuo nga susamang face shield mamuwak bisan asa paglabay sa pipila ka semana.
Sa iyang tulomanon sa DYAB kay wala pa man pasirad-i niadtong panahona, si Atty. Bentulan padayon sa iyang krusada labot sa pandemiya. Hugot ang iyang baruganan nga taliwala sa pagpakigsakbang sa pandemiya, hatagan og igong gibug-aton ang pagsalbar sa ekonomiya.
Pebrero 4, 2020 ang maong tapoktapok ug mao say una nakong pagkadungog sa dakong hulga nga pandemiya.