SA KADAGHAN nga nagyampungad sa online sabong sa Encabo Street, Guadalupe Village, Barangay Matina Crossing, Davao City, tulo lang kanila ang nasikop human kini nanglayat.
Perteng panagan nga daw nabungkag nga lampinig ang tapok sa mga sabungero alas 5:30 sa hapon, Enero 30, 2021, dihang nangabot ang mga pulis sa Talomo Police Station nga gipangunahan sa hepe nga si Police Major Sean Logronio.
Kasong paglapas sa Presidential Decree (PD) 1602 ug Republic Act (RA) 11332 in relation to Executive Order 57-A Series of 2020 "Social Distancing" ang atubangon sa tulo ka mga dinakpan.
Una niini, ang Talomo police nakadawat og impormasyon labot sa mga nagtapok nga mga sabongero, hinungdan nga giambakan dayon sa intel sa Talomo police sa pagpanguna ni Police Lieutenant Rizalito Clapiz III.
Usa ka cellphone ug pusta nga kuwarta ang nakuha sa posisyon sa mga dinakpan.
Sa kasamtangan, balhog ang mga suspek sa selda sa Talomo police kinsa mag-atubang og kaso didto sa korte.