DUGANG 15 ka mga kaso sa coronavirus disease (Covid-19) ang natala sa Cagayan de Oro sulod sa duha ka adlaw, sumala sa report sa City Health Office Lunes, Pebrero, 1, 2021.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,329.
Sumala ni Acting City Health Officer Dr. Lorraine Nery, sa 15 ka mga bag-ong lokal nga mga kaso, siyam ang mga close contacts sa mga pasyenteng nagpositibo sa coronavirus, tulo ang mga local authorized persons outside residence (Apors), ug tulo ang mga local index nga mga kaso.
Sa 3,329 nga kinatibuk-ang kaso sa Covid-19 sa syudad, 419 ang mga returning overseas Filipino workers/locally stranded individuals (ROFs/LSIs) ug 2,910 ang mga local transmissions.
Ang Cagayan de Oro adunay 296 ka mga active cases, 99 niini na-admit sa Northern Mindanao Medical Center ug uban pang mga ospital sa syudad, 196 ang mga outpatients, ug usa ang ROF/LSI.
Nakatala usab og 35 ka mga Covid-positive nga mga kaso nga karon naka-recover, 31 niini negatibo ang reswab ug upat ang mga certified recovered. Anaa na karon sa 2,866 ang ihap sa mga nakarekober nga mga kaso sa dakbayan.
Sa maong numero, 300 ang mga LSIs, 117 ang mga ROFs, ug 2,449 ang mga lokal nga kaso (community: 2,070; Apors: 379).
Ang ihap sa mga namatay sa Covid-19 sa syudad naa sa 167.