Sa unang tan-aw daw sama sa ordinaryong teenager ang 19-anyos nga si Jewel Dumaran kon wala siya sulod sa gym.

Apan lahi ang iyang imahe kon anaa na kini sa iyang comfort zone nga mao ang mixed martial arts.

Luyo sa iyang inosenteng panagway mao ang kahanas sa mixed martial arts, usa ka paugnat sa kusog nga gidominar kasagaran sa mga lalake ug menos lang ang babaye.

Nagsugod si Dumaran niining MMA sa nag-edad pa siya’g 11 anyos kay gusto niyang protektahan ang iyang kaugalingon kon mabutang siya sa alanganin nga sitwasyon.

Nahimong hobby niya ang MMA hangtod nga moapil na siya og mga tournament sama sa Batang Pinoy diin midaog siya’g bronze medal niadtong 2015 ug silver medal sa sunod nga tuig.

Sigon sa Grade 12 student sa Southwestern University-Phinma, dako og natabang sa iyaha ang maong paugnat sa kusog ilabi na sa disiplina sa kaugalingon.

Pangandoy ni Dumaran nga mahimong police officer maong nangandam siya sa iyang pagsulod puhon sa kolehiyo sa kursong Bachelor of Science in Criminology.

Matod niya, ang MMA dakong tabang kon moeskwela na siya’g Criminology kay nanginahanglan kini og physical fitness.

Plano unta ni Dumaran nga mosalmot sa Philippine National Games, usa sa qualifying event para sa mga national athlete apan nakanselar kini tungod sa hulga sa pandemiya.

“Para nako gamit kaayo ni sa babaye kay self-defense gyud ni labi na sa panahon karon,” saysay niya sa Superbalita Cebu sa interbyu sa Yaw-Yan ArDigma Cebu gym sa dalan Sanciangko, Dakbayan sa Sugbo.

Sa iyang bahin, ang founder sa Yaw-Yan Ardigma Cebu nga si Master Benigno “Ekin” Caniga miingon nga dili daghan ang mga fighter nga babaye sa MMA apan aduna gihapon taas nga numero sa mga practitioner nga nagkat-on niini isip fitness exercise. Si Dumaran usa ka produkto sa Yaw-Yan Ardigma Cebu.

“Kon exercise ang hisgotan grabe maka-lose weight ang program sa MMA. Kon constant lang ang training makuha gyud dayon ang fitness goal. Doble imo makuha ani, fitness ug makat-on kag self-defense,” batbat ni Caniga.

Si Caniga, ang labing inila nga MMA promoter sa Sugbo, midugang nga abli ang ilang gym alang sa mga interesado nga mokat-on.

Iyang giseguro nga gasunod gyud sila sa mga health protocol nga gimando sa Inter Agency Task Force, Department of Health ug sa national government.

“Akong gi-invite kadtong mahiligon sa contact sports nga mosuway diri sa atong gym. Puwede kini nga sport bisan sa babaye kay maka-assure man ta nga safe gyud ang MMA,” matod ni Caniga.

Dili lang mga lalake ang misikat sa MMA sa Estados Unidos anaa pud ang mga babaye nga gipangulohan sa 33-anyos nga si Ronda Rousey—usa ka model ug martial arts fighter.

Sa mga interesado, pwede motawag sa Yaw-Yan Ardigma Cebu 0943-3658900 o dili kaha sa Facebook page sa Yaw-Yan Ardigma Cebu.