NAA na ta sa buwan sa Pebrero kon kanus-a gipaabot modagsa sa Pinas ang mga nagkadaiyang bakuna batok sa Covid.
Apan kon edaran na ka ug duna na kay mga gipamati mas maayo tingaling magpakonsulta una sa doktor sa di pa mo magpabakuna.
Kay duna koy higala nga gipasidan-an sa iyang sister nga nagbase sa New York nga ang mga edaran kuno nila didto gipang-allergy human nabakunahan.
Duna kunoy nanghubag ang mga nawong ug tiil samtang ang uban nag-rashes. Duna say mga niubos ang platelet ug wa na gyud intawon ka-recover.
Kahibawo na tingali mo sa nahitabo sa Norway nga daghan sad sa mga edaran nila didto ang nangamatay human naturokan sa unang dose sa vaccine. Mao nga ang European health authority mipahimangno nga, “Covid-19 vaccines may be too risky for the very old and terminally ill.”
Klaro nga kining mga naghimo sa bakuna nag-eksperimento pa sad ni sila kay wa pa may Covid sa una. Karon ra man ni. Nahug ta aning tipik sa ilang “trial and error.” Ah, naa ra ninyog magpabakuna ba mo.
VALENTINES NA PUD
Karong Valentines mas maayo sa balay na lang mag-happy hour. Kuyaw kaayo mo-check-in rong panahona tungod aning pandemya.
Pero duna ra bay bag-ong anti-noise ordinance nga nagdili na ang magpatukar og kusog sa karaoke ug sound system sa mga residential area.
Ambot kon masunod ba sad kaha ni nga tipik na man sa kultura sa mga Pinoy ang magpatukar og kusog kon dunay okasyon.
JEROME SALA
Kahinumdom pa ba mo ni Jerome Sala, kadtong nag-grand champion sa 2005 Star in a Million sa ABS-CBN?
Teenager pa lang niadto dihang nidaug si Jerome sa Star in a Million. Karon 34 anyos na ang Boholanong singer ug duna nay lima ka anak sa iyang gwapang misis nga si Honey nga taga-siyudad sa Sugbo.
Sa tanang nahimong kampyon sa Star in a Million bugtong si Jerome ang wa mopadayon sa showbiz. Kay silang Kris Lawrence, Frenchie Dy, Sheryn Regis ug Erik Santos puros aktibo pa man gihapon sa Manila.
Karong bag-o akong naka-chat si Jerome ug nisaad ni nga magpa-interbyu sa atong SuperKa! sa higayon nga dili na siya busy.
Gawas sa iyang hardware ug construction business sa Bohol nahilig sad ni siya karon sa motocross nga maoy paborito niyang hobby.