NANGANHI sa Sugbo kagahapon silang Partylist Congressman Omar Albano Fajardo ug Philippine National Coalition (PNC) SecGen Abner Malabanan aron iduso ang pederalismo.
Abi gyud nako og naundang na kining maong kalihokan.
Ako mismo aktibo sa pagtukod og mga kalihokan sa National Movement for Federalism (Namfed). Gani, naa kitay gipahigayon nga mga rali sama adtong didto sa Syudad sa Naga.
Kami mismo ni Tonton Antogop nangadto sa usa ka konsultasyon nga gipahigayon sa Syudad sa Dumaguete.
Niadtong tungora, nag-coordinate kita ni Secretary Addie Sitoy ug Tuburan Mayor Aljun Diamante. Nahunong kining maong kalihokan tungod sa lokal eleksyon sa 2019.
Apan atong nasabtan karon nga gipadayon ang maong kampanya aron matuman ang gitinguha nga pag-usab sa sistema sa politika sa nasud.
Giisplikar nilang Fajardo ug Malabanan nga mahimong iduso ang pederalismo pinaagi sa revolutionary government kun revgov.
Matod pa, walay labot si Presidente Rodrigo Duterte. Bisan pa man, kining ilang kalihokan karon kay abli ug dayag nga gibuhat.
Komunista
Isog kaayo ang administrasyon ni Presidente Rodrigo R. Duterte batok sa mga komunistang Pinoy. Giinitan gud ang giingong pang-rekrut sud sa mga tunghaan bisan og online ang mga klase. Apan, hadlok sa mga komunistang Insek nga nagkiat sa West Philippine Sea.
Usa sa nakapaaghat nakog sulat niini kay nagkiat na sab ang bogo nga mga komentaryo sa social media.
Matod pa, way komunistang nasud nga malampuson.
Tinuod, naa sab gyuy mga palpak. Usa niini mao ang Unyong Sobyet, ang labing unang nasud diin nidaog ang mga Walhon kaniadtong Oktubre 1917.
Apan duna baya say malampuson sama pananglit sa Vietnam.
Napildi sa Vietnam ang Amerika human sa taas kaayo nga gubat. Gani, napildi sa Vietnam ang Hapon ug Pransya. Ug karon, maayo kaayo ang ilang anti-Covid response. Sila pay positibo ang performance sa ekonomiya sa miaging 2020.
Ang ako lang nga angay nang pugngan ang hinayhinay nga pag-angkon sa China sa atong mga isla sa West Philippine Sea. (@anol_cebu sa Twitter)