MODAGHAN pa unya ang matakdan sa Covid-19 dinhi sa Dakbayan sa Sugbo kon ibaliwala na lang sa katawhan ang minimum health protocol nga gilagda ug gipatuman sa kagamhanan pinaagi sa Department of Health (DOH). Matod pa sa pagtuon sa Octa Research, mosaka pa sa 150 ka tawo matag adlaw nga matakdan sa Covid-18 kon magpasagad ang mga residente dinhi sa Dakbayan sa Sugbo.

Sa miaging semana, dunay 78 ka bag-o nga mga kaso sa Covid-19 basi sa pagtuon sa Octa Research nga ilang gipagawas niadtong Enero 30. Ang DOH Central Visayas Bulletin niadtong Enero 31 nagtala og 129 ka bag-o nga kaso sa Covid-19 sa Dakbayan sa Sugbo, nga miabot na sa 1,429 ang total. Mao na ni ang akong giingon sa unahan nga resulta sa mga selebrasyon atol sa Pasko, Bag-ong Tuig ug Pista Senyor. Naay daghan nga akong malabyan nga nagpundok-tabi nga way mask.

Maayo na lang kay napugngan si Cebu City Vice Mayor Mike Rama sa IATF nga dili ipadayon ang Sinulog showdown niadtong Enero 17. Ang barangay nga mosalmot sa Sinulog showdown, nga nag-ensayo na maoy dunay daghan kaso karon sa Covid-19.

Ang dakbayan sa Lapu-Lapu dunay 47 ka bag-o nga kaso sa Covid-19. Sa Mandaue City dunay 28 ka bag-o nga kaso ug mitotal na sa 343 ka kaso. Ang Probinsya sa Sugbo dunay 47 ka bag-o nga kaso ug miabot na ni og 636 tanan ka kaso.

Sa miaging mga adlaw, bisan sa nagsaka na ang numero sa kaso sa Covid-19 sa Dakbayan sa Sugbo, lakip na ang probinsya, si Cebu city Konsehal Joel Garganera, deputy implementer sa Emergency Operations Center (EOC), nagpasabot nga dili pa angay nga kabalak-an ang sitwasyon tungod kay ang mga isolation center ug mga hospital sa dakbayan wala mapuno sa mga pasyente. Unya na molihok og puno na ang isolation centers ug hospitals?

Si Gob. Gwen Garcia wa mahimuot sa pagtuon nga gihimo sa Octa Research nga gipindotan dayon og alarma ang Cebu sa nagsaka nga kaso sa Covid-19. Alang kang Gobernador Garcia di gani makomparar sa hugaw sa kuko ang gidaghanon karon sa mga natakdan sa Covid-19 kon itukma sa kapin sa tres milyunes nga popolasyon sa probinsya.

Ang Octa Research usa ka independente nga interdisiplina nga pundok sa panukiduki, nga gisakopan sa mga magtutudlo sa Univerity of the Philippines ug gisuportahan sa Univerity of Sto. Tomas ug US-based Providence College. Dako og tabang ang Octa Research sa atong kagamhanan sa pagsubay sa numero sa kaso sa Covid-19. Alang kanako angay nga pasalamatan ang Octa ug ilang ipadayon ang pagdukiduki kay mao ni ang kuwang sa administrasyon.

Ang Cebu City man gud ang naila nga pirmi mag-una sa listahan dinhi sa Sugbo sa pagsaka sa kaso sa Covid-19 tungod kay daghan og gahi’g ulo matod pa ni Presidente Duterte mao nga iyang gipadala dinhi si DENR Secretary Roy A. Cimatu sa miaging tuig aron kusganon nga ipatuman ang mga health protocol.