NAGKARA-KARA ug naglumba ang nasudnong kagamhanan ug pipila ka mga local government units (LGUs) nga mopalit gyud og bakuna sa nagkalain-laing manufacturers sa gawas sa nasud. Pero andam na ba sila sa pagpatuman sa vaccination program? Kon andam na, sigurado kaha sila nga daghan o halos tanang tawo sa nasud magpabakuna?
Kining hesitation o pagpanagana sa katawhan nga magpabakuna batok sa Covid 19 wala lang mahitabo dinhi sa atong nasod. Mao usab kini ang nahitabo sa ubang kanasuran bisan sa adunahan ug advanced countries sama sa Estados Unidos. Anaa gihapon kanila ang pagpanagana. Apan maayo na lang nga kadaghanan sa mga lider sa maong mga nasud niboluntaryo man nga magpakita sa katawhan sa pagpabakuna.
At least, makatabang kini sa pagsaka sa pagsalig sa ilang katawhan sa bakuna. Apan sukwahi dinhi sa ato gumikan kay si Presidente Rodrigo Duterte sulod-gawas man sa iyang mga pamahayag kon magpabakuna na siya. Una, siya niingon nga siya maoy unang magpabakuna, bisan sa bakuna nga hinimo sa China ug Russia. Sa dihang mibuto ang balita nga adunay nangamatay nga senior citizens sa Norway nga gibakunahan sa Pfizer-BioNtech, niingon na pod siya nga magpa-uwahi kay iyang unahon ang katawhan. Salin na lang ang iya.
Karon, niingon na pod ang Presidente nga magpabakuna siya apan di magpakita sa publiko kay sa lubot o sampot siya magpatusok. Igo lang niya ianunsiyo. Ngano man nga di siya magpakita? Kay mauwaw siya nga makita ang iyang sampot? Sila si Queen Elizabeth ug iyang bana sa Britanya nagpatusok man, apan wala magpakita sa publiko.
Mas maayo unta nga magpakita sa publiko si Digong kon magpatusok kay aron maengganyo usab ang katawhan. Kon aduna may number 1 endorser aning vaccination program, way lain kon di si Presidente Duterte mismo. Gitan-aw ang Presidente sa katawhan nga modelo. Taas god ang iyang trust rating. Labi pa karon nga daghan ang nagpanagana ug nagduha-duha. Pero nagduda ko nga humana ni og pabakuna si Digong apil niadtong bakuna sa iyang mga sakop sa Presidential Security Group (PSG). (bobbygnalzaro@gmail.com)