TACURONG CITY — Miangkon na ang uyoan nga siya ang naglugos ug nagpatay sa iyang pag-umangkon niadtong miaging semana sa Isulan, Sultan Kudarat.
Giila ang suspek nga si Jay Albestor, 47, samtang ang biktima si Maria Dagohoy Banaag, 6, pulos molupyo sa West Capitol, Barangay Kalawag 2 sa maong lungsod.
Nasayran nga mitambong lang ang bata sa birthday party sa iyang paryente didto sa Barangay Kulambog, apan miabot na lang ang gabii, wala pa makauli ang bata sa ilang balay busa sa dihang gipangita, nakit-an ang patay nga lawas niini nga nagbuy-od daplin sa Allah River sa Purok Kaunlaran, Barangay Bambad.
Sa imbestigasyon sa kapulisan, migawas nga si Albestor maoy ulahing nakauban sa bata.
Giasoy ni Albestor nga iyang gitagaan ang bata og candy aron mouban kaniya daplin sa suba.
Nagbasol ang uyoan sa iyang nabuhat tungod sa sobra niyang kahubog.(Edgar E. Fuerzas)