MAMAHIMONG makapalit sa Sugbo ang mga taga gawas o ang mga taga Sugbo makabaligya sa gawas og karneng baboy ug mga produkto niini, apan dili ang buhi ug anay.
Kini maoy giklaro ni Cebu Governor Gwendolyn Garcia sa iyang pakighinabi sa mga tigbalita sa Pebrero 2, 2021.
Gipasabot ni Garcia nga wa magpasabot nga di na makabaligya ang mga magpapatigayon og baboy sa Sugbo sa ubang mga lugar ilabi na sa Luzon ug ubang bahin sa nasud nga nag nìhit na ang supply.
"Kani mopalit sa Manila, palit mo diri. Ang dili pwede paliton ang buhi nga baboy ug ang anay.Mao bitaw nahurot na ang baboy sa Luzon maong nia na diri mamalit," matod ni Garcia.
Subay sa kamandoan ni Garcia, ang di mahimong ibaligya mao ang buhi nga baboy ug mga anay dinhi sa Sugbo ngadto sa laing lugar.
Ang iyang tumong mao ang pagsiguro nga adunay igo nga supply ang Sugbo ug ma-balanse ang supply ug panginahanglan.
"We are cutting off the transport of live hogs because this is the measure by which we can curtail or tagaan og break gamay ang pagsaka sa presyo...Mahal na man ang baboy pero asa man na magsugod, kon mahal na ang palit? Gani you have to be aware nga ang Siquijor nag shortage na pod," matod ni Garcia.
Ang kamandoan magpabilin sulod sa unom ka buwan.
Una na nga nisaad si Garcia nga iyang panalipdan ang P11 bilyones nga hog industry sa Probinsya sa Sugbo gikan sa ASF sanglit mas kahadlokan ang maong sakit tungod sa 100 percent nga mortality rate sa mga baboy nga maigo.
"We have to preempt always. Kinahanglan proactive ta. First and foremost, we have to protect Cebu.
Cebu and Cebuanos first," nagkanayon si Garcia.
Dugang ni Garcia nga wa usay gisupak nga lagda ang Probinsya labot sa African Swine Fever (ASF) Zoning plan.
"I will protect Cebu...there is nothing in the ASF zoning plan that I violated...Ato lang hinumdoman ang nangagi nga at the time nga nakakita ko sa risgo sa kababoyan sa ASF, I was told I was overreacting...Ingon nila na control nila sa Luzon, wa naman lagi baboy ron?,"matod ni Garcia. (ANV)