Gihulagway sa kapulisan sa Siyudad sa Sugbo nga malampuson sila sa tulo ka adlaw nga simultaneous-anti criminality law enforcement operations (Sacleo) niadtong Enero 27-29.
Moabot ngadto sa dul-an P6 million nga balor sa illegal nga drugas ang ilang nasakmit.
Nakahimo silag 43 ka mga anti drug operations, diin 58 ka drug personalities nadakpan samtang 88 usab ka tawo nasikop sa illegal gambling sa 44 ka operations.
Nakasilbi usab sila og 36 ka warrants of arrest sa lainlaing mga kaso, apan 28 lang ang nadakpan.
Matod ni Police Lieutenant Colonel Wilbert Parilla, deputy city director for operations sa Cebu City Police Office, nga niubos ang supply sa illegal nga drugas itandi sa nanglabay nga dungan nga operations kay makasakmit silag tag duha ka kilo sa shabu.
Dugang ni Parilla nga kasagaran sa ilang nadakpan mga bag-ong drug player human nga ang mga notado nangsikop na sa nanglabay nga anti drug operations.
Nag-una nga police stations nga nakasikop sa mga durugista mao ang Mambaling ug Mabolo Police Station.
“But duna tay reports nga na receive diri sa area sa station 11 they are using sa mga minors nga maoy gigamit sa pagpamaligya, kay kahibalo man sila nga ang mga minors mas dali nga makagawas and then kini pang below 15 years old has no criminal liabilities,” matod ni Parilla.
Bisan sa padayon nga pagsaka sa mga kaso sa coronavirus disease (Covid-19), magpadayon gihapon sila sa ilang sub-sub nga kampanya batok sa illegal nga drugas. /