IBALIK na sa kapulisan sa Siyudad sa Sugbo ang Task Force Kasaligan, apan gikan sa 170, ang mabilin 108 na lang.
Ang kapin 60 diay kanila nasuta nga di taga Dakbayan sa Sugbo.
Matod ni Police Lieutenant Colonel Wilbert Parilla nga gisaad sa Cebu City Hall nga manguha na usab silag dugang 100 alang sa task force nga sarang makatabang sa kapulisan sa siyudad.
“Sa out of 170, naa tay 108 nga maka balik and they are required to report tomorrow (February 3, 2021) for duty. And then ang Cebu City mag recruit nasad og additional nga 100 ka buok,” matod ni Parilla.
Dako og matabang ang pagbalik sa Task Force Kasaligan ilabi na nga kuwang ang personnel sa CCPO nga mo-roving sa kabarangayan aron mopatuman sa lagda sa Inter-Agency Task Force ug sa executive order ni Mayor Edgardo Labella.
Daghan silag nadakpan sa 2020 nga ninglapas sa executive order sa mayor samtang sila nag-roving sa nagkadaiyang mga barangay sa siyudad.
Sila maoy niabag sa kapulisan sa pagpatuman sa mga health protocol ug mga lagda sa Siyudad sa Sugbo.
Sa dihang nahunong ang pagpakatap sa Task Force Kasaligan, gipatabang sa Cebu City Police Office (CCPO) ang mga personnel niini nga nagsilbing contact tracer.
Sud sa upat ka adlaw nga labaw sa 100 ang mga kaso sa Covid-19 sa siyudad. (AYB)