MOABOT sa 2,500 ka mga benepisyaryo sa Tulong Panghanapbuhay sa Ating Disadavantaged/Displaced Workers (Tupad) sa Dakbayan sa Lapu-Lapu nakadawat na sa ilang sweldo isip mga street cleaner niadtong Enero 31, 2021.
Sa pagtabang ni Kongresista Paz Radaza, ang mga benepisyaryo sa 15 ka mga barangay sa isla sa Olango ug mainland Lapu-Lapu nakadawat na sa ilang mga reference number aron gamiton sa paglukat sa ilang sweldo sa money remittance.
Ang mga benepisyaryo nagagikan sa Barangay Caohagan, Baring, Caubian, Pangan-an, Tungasan ug Sabang sa isla sa Olango samtang Barangay Calawisan, Ibo, Buaya, Maribago, Babag, Gun-ob, Basak, Subabasbas ug Mactan sa mainland.
Ang matag usa kanila makadawat og P404 matag adlaw sulod sa 14 ka adlaw nga pagtrabaho ubos sa Department of Labor and Employment (Dole) Tupad Program sa Bayanihan Act 2.
Mapasalamaton ang kongresista sa Dole 7 pinangulohan ni Regional Director Salome Siaton sa paghatag og prayoridad sa mga Oponganon sa pagpagawas sa ilang sweldo ug pagpatuman sa programa sa dakbayan.
Gihimug-atan ni Radaza nga sayod siya unsa kalisod ang sitwasyon sa kadaghanan niining panahon sa pandemya hinungdan nga ang mga programa sama sa Tupad mao ra usab ang ilang gisaligan aron makapalit og pagkaon ug panginahanglan. (GCM)