MAAYONG pagkahilos sa nawong, dughan ug bahin sa bukton sa 12 anyos nga dalagita ug nahap sab ang iyang panan-aw human siya sabligi og pinabukalanag tubig sa iyang hubog nga ama-ama.
Bugtong hinungdan nga napungot ang ama-ama tungod kay adobo iyang gi-request alang sa iyang panihapon niadtong Lunes, Pebrero 1, 2021 apan utan maoy gisukad sa bata.
Ang insidente nahitabo sa ilang panimalay sa Barangay Liong, Lungsod sa Dumanjug, Sugbo.
Giila ni Police Corporal Leslie Lañojan, Women and Children Protection Desk sa Dumanjug Police ang ama-ama nga si Rey Quisio, 35, traysikad drayber.
Saysay sa imbestigador sa Superbalita Cebu nga nipauli si Quisio sa ilang balay nga nakainom ug nimandar ngadto sa bata nga magsukad kay manihapon na siya.
Napungot si Quisio sa sud-an nga utan maoy gihukad pinaresan sa bahaw nga kan-on, kay nangita siya og adobong baboy.
Sa iyang kalagot gihapos niini ang plato hinungdan nga nahilam-os sa bata sa kan-ong bahaw, gibalibag sab ngadto sa dalagita ang sud-an nga alang niya way lami.
Wa pa matagbaw si Quisio gilabnot ang buhok sa bata dungan sa pagparok sa ulo niini ngadto sa ilang abuhan.
Ang pinabukalang tubig nga gitak-an sa bata nga mao untay buyokan sa kan-ong mais, gisablig niini ngadto sa bata.
TABANG
Wa na ka-ako og tan-aw ang inahan kinsa upat ka buwan gikan sa iyang pagpanganak ug kulatado sab sa iyang kapuyo ang nanawag og pakitabang.
Suway pang misukol si Quisio sa responding team sa Dumanjug police apan gilupig sa kusog hinungdan nga gipusasan.
Samtang gidali sa pagdala sa ospital sa lungsod Barili si Jennie nga nagping-it sa kahapdos sa iyang panit.
Makatilaw og kulata dili lang ang inahan sa bata lakip na ang 14 anyos nga igsuong lalake niini nga pulos anak sa unang kapuyo.
Samtang si Quisio adunay anak sa ilang inahan nga nagpangidaron og usa ka tuig ug laing upat ka buwan nga bata.
“Basta mahubog ni siya mangitag laming sud-an ‘adobo’ raba iyang i-request.
“Naproblema intawon ang kapuyo ug mga bata unsay ipaka-on nga magsige lang og inom, unya sa trisikad ray income,” dason ni Lañojan.
LAMI NGA SUD-AN
“Nasuko ko kay nawala naman ang usa ka dakong hiwa sa humba. Ako to gibilin gisulod sa bawnanan, walay niangkon kinsay nikaon maong nagkalalis mi sa ako kapuyo,” matod ni Quisio.
Giklaro ni Quisio nga usa ra ka botelya sa Kulafu iyang giinom nianang hapona kay gikan siya nagdaro.
Sumala pa nga half-day namasada sa traysikad ug nagdaro sa umahan ug nagpalit siya og isda nga pinirito samtang ang uban giutanan.
“Wala ko makontrolar akong kaugalingon kay kadtong humba nga gihatag sa among silingan nga akong gibilin apan nawala.
“Tinuod na mangita gyud kog lami na sud-an adobo o sabaw sa nilat-an kay nagkugi gud ko og pamasahero,” matod niya.
KASO
Mag-atubang og kasong Child Abuse si Quisio.
Nangayo og pasaylo si Quisio sa iyang nahimo ug napugos siya sa pagbaligya sa ilang binuhi nga baboy kay ang halin niini gamiton sa pagpatambal sa 12 anyos.
Gibutyag ni Lañojan nga makaluluoy ang sitwasyon sa bata ilabi na nga ang iyang 14 anyos nga maguwang mao ray nagbantay sa ospital, kay dili makabiya ang ilang inahan tungod sa mga gagmayng manghod niini.
Ang lokal nga kagamhanan sa Dumanjug ang miabag sa panginahanglanon sa bikima ingon man ang Department of Social Welfare and Development (DSWD).