SINGLE digit kun wala makaabot og 10 ka kaso sa coronavirus disease (Covid-19) sa Cagayan de Oro human tulo na lang ka mga residente ang mipositibo sa virus, sumala sa report sa City Health Office sa dakbayan.
Ang kinatibuk-ang ihap sa mga kumpirmadong kaso sa Covid-19 sa syudad anaa na sa 3,332.
Sumala ni Acting City Health Officer Dr. Lorraine Nery nga sa tulo ka mga bag-ong lokal nga kaso, usa ang close contact sa pasyenteng nagpositibo sa coronavirus, usa ang lokal authorized person outside residence (Apor), ug usa ang local index case.
Matud ni Mayor Oscar Moreno nga samtang nalipay siya nga tulo ra ang na-report na mga bag-ong kaso sa dakbayan, kinahanglan gihapon nga magpadayon ang publiko sa pag-obserbar sa minimum public health standards.
"Nalipay ta nga tulo ra ang na-report karon pero I want to emphasize, dili gyud ta angay magkompyansa," ingon ni Moreno.
"Mas maayo gyud unta paminawon nga gamay na lang gi-report kay wala na gyuy mga bag-ong positive. That can only happen kung ang katawhan mag kooperar. Let's do it mga igsoon, kaya man nato na," dugang niini.
Sa 3,332 nga kinatibuk-ang kaso sa Covid-19 sa syudad, 419 ang mga returning overseas Filipino workers/locally stranded individuals (ROFs/LSIs) ug 2,913 ang mga local transmissions.
Matud ni Nery, sa 2,913 nga mga local nga kaso, 185 ang mga persons deprived of liberty (PDLs), 1,467 ang mga local index cases, ug 1,261 ang mga local cases with link.
Ang Cagayan de Oro adunay 259 ka mga active cases, 72 niini na-admit sa Northern Mindanao Medical Center ug uban pang mga ospital sa syudad, 186 ang mga outpatients, ug usa ang ROF/LSI.
Nakatala usab og 38 ka mga Covid-positive nga mga kaso nga karon naka-recover. Anaa na karon sa 2,904 ang ihap sa mga nakarekober nga mga kaso sa dakbayan.
Sa maong numero, 300 ang mga LSIs, 117 ang mga ROFs, ug 2,487 ang mga lokal nga kaso (community: 2,095; Apors: 392).
Ang ihap sa mga namatay sa Covid-19 sa syudad naa sa 169.