GIBANA-BANA nga P2 milyon nga kantidad sa mga ilegal nga druga ang nadiskobrehan sa mga gidonar nga mga silhig lanot sa usa ka relihiyusong organisasyon ngadto sa Davao City Jail-Male Dormitory (DCJ-MD) niadtong Martes, Pebrero 2, 2021.
Ang Bureau of Jail Management and Penology (BJMP) sa Davao Region nakarekober og 26 ka buok nga transparent nga plastic sachets nga dunay sulod nga gituohang shabu gibugkos sa gamit ang packing tape, tulo ka buok tubular pipe, ug usa ka transparent plastic sachet nga dunay gisuspetsahang sulod nga bunga sa marijuana.
Mga narekober nga butang dunay gibanabana nga kantidad P2,080,000.
Gibutyag ni BJMP Jail Senior Inspector Ellen Rose S. Garcia nga ang donasyon nahimo niadtong Disyembre 19, 2020, apan wala kini dayon maapud-apod kay di kuwang sa tibuok ihap sa mga selda sa BJMP.
Hinungdan nga mga butang gipahimutang una sa stockroom alang sa katapusang inspeksiyon una kini itunol ngadto sa mga persons deprived of liberty (PDLs).
Ang ilang buhatan nakadawat og intelligence reports bag-ohay lang nga ang donasyon dunay gipakapin nga kontrabando hinungdan nga dali nilang gisusi ang mga silhig.
"We opt not to release muna (yet) the names of the suspect and their affiliated organization for reasons of presumption of innocence and the source of the presumed illegal drugs are still under investigation," matud ni Garcia.
Giklaro niya nga ang maong relihiyusong organisasyon di kanunay nga nakig-partner sa BJMP sa paghatag og mga serbisyong relihiyuso.
"We only accepted the donation kasi (because) in the spirit of Christmas but of course, hindi namin dini-distribute ang mga bagay na di pa namin na-inspect," tin-aw sa opisyal.
Apan gitin-aw sab ni Garcia nga subay sa protocol, ang gidonar nga mga butang kinahanglan nga susihon dayon sa pagdawat niini, hinungdan nga nihimo sila karon og administrative investigation aron nga madeterminar kon duna bay mga "lapses" sa bahin sa DCJ-MD.
"Anybody found liable will be prosecuted accordingly," pasalig niya.
Sa pagkakaron, tug-an niya, ang BJMP-Davao mas maigmaton pa ug palig-unon ang ilang intelligence monitoring aron nga wa nay kontrabando nga makalusot sulod sa Davao jails.
Kahinumdoman nga niadtong Disyembre 2020, ang bureau nakarekober sab og mga ilegal nga druga nga gipaslak uban sa mga noodles kantidad og P1.8 milyon nga gidonar sa lain sab nga relihiyusong organisasyon.
Mga nasakmit nga kontrabando gitunol na ngadto sa Philippine National Police-Davao alang sa dugang pagsusi sa crime laboratory ug ang pangalan sa mga tawo o tawo nga nagdonar niini girekord na alang sa dugang legal nga lakang.