Kanhi sakop ni Sabalones nasikop

KANHI sakop ni anhing drug lord Franz Sabalones nasikop sa buy-bust sa Parian Police sa Miyerkules sa hapon, Pebrero 3, 2021, sa Sityo Holy Name, Barangay Mabolo, Siyudad sa Sugbo.

Ang Parian Police Station, pinangulohan ni Police Major Armando Labora, uban sa iyang Drug Enforcement Unit (DEU), ni buy-bust kang Alvin Ripillo, sityo Sindulan, Barangay Mabolo.

Matod ni Labora, si Ripillo maoy nag-supply og drugas ni John Carl Bersede, 22, taga Sityo Ocaña, Barangay Guadalupe, Siyudad sa Sugbo, kinsa apil sa nasikop.

Nasakmit gikan sa duha ang 45 gramos sa shabu nga mokantidad og P306,000 base sa Dangerous Drugs Board (DDB) value.

Dugang ni Labora nga si Ripillo, kinsa kanhi sakop ni Sabalones, anaa naglihok sa Dakbayan sa Toledo kaniadto.

Si Ripillo gihulagway usab ni Labora nga high value individual sa provincial ug regional level.

Taudtaud na siyang gipangita sa kapulisan ug nasuta nga anaa na diay nagpundo sa Barangay Mabolo.

TDugang ni Ripillo nga sukad niadto wala na siya nag apil-apil sa drugas kay nahadlok siya nga basin maapil siya sa listahan.

ASAL-ASAL LANG

Samtang sa buy-bust sa Phiippine Drug Enforcement Agency (PDEA) 7 sa Barangay Poblacion, lungsod sa Ginatilan, usa ka high value individual nasikop.

Si Investigation Agent 1 Mario Portugal sa PDEA 7 maoy nangu sa pag-serve sa search warrant nga miresulta sa pagkasikop ni Niel Buagas, taga Barangay Poblacion.

Dugang ni Portugal nga moabot sa 11 gramos sa shabu ang ilang nasakmit gikan kang Buagas nga dunay kantidad kapin sa P70,000 subay sa DDB.

Matod pa ni Portugal nga si Buagas nagpantalya sa iyang negusyo nga mao ang pagbaligya sa litson manok.

Si Portugal niingon nga ang ngan ni Buagas niabot sa mga intelligence report sa kaulohan.

Kini gipasa ngadto na kanila hangtod nga ilang gisugdan sa pag monitor niadtong Disyembre.

Hangtod na nga nakompirmar ug sila ni-apply og search warrant aron dakpon si Buagas. (BBT)