WALAY mahitabo nga selebrasyon sa Chinese New Year sa Dakbayan sa Sugbo karong Pebrero 12, 2021 gawas sa mga balay aron malikayan ang pagtapoktapok sa daghang mga tawo.
Kini ang gipahibawo ni Mayor Edgardo Labella, kinsa nangayo og dispensa sa Filipino-Chinese community.
Nangayo og pagsabot ang mayor sa sitwasyon karon gumikan sa pandemya.
“Hinaot nga masabtan kini sa atong mga kaigsuonan nga Filipino-Chinese nga ato lang usa ning i-forego,” matod ni Labella sa iyang official Facebook page. “Magtinabangay kita aron dili na mosamot pa ang transmission sa virus,” dugang sa mayor.
Kadtong mga pamilya nga gustong mosaulog anha ra sulod sa ilang mga balay, mahimo rang buhaton sanglit di makalapas sa mass gathering.
Si Labella nagkanayon nga bisan kon kontrolado ra ang pagsaka sa gidaghanon sa mga nataptan sa Covid-19, likayan lang una ang mass gathering.
Atol sa virtual press conference ni Labella duha na ka adlaw ang nakalabay, iyang gipadayag nga di na niya huwaton nga adunay mga request nga moabot sa iyang opisina para mananghid sa pagpahigayon og selebrasyon pagsaulog sa Bag-ong Tuig sa mga Chinese.
Sa miaging mga tuig, adunay mga kalihukan nga pagahimuon ang mga Filipino-Chinese agi og pagsugat sa Chinese New Year labi na sa mga hotel ug dagkong malls.
Apan karon, di na kini tugotan ni Labella.
Gawas niini, daghan na usab og mga patakaran nga gipatuman ang Cebu City Government, Department of Trade and Industry (DTI) ug Department of Tourism (DoT) para malikayan ang posible nga pagtakod sa virus.
Sa pagsuwat ning taho, ang Cebu City adunay 1,613 ka aktibong mga kaso sa Covid-19 diin 142 ang natala niadtong Pebrero 2.