GIPATUMAN sugod kagahapon, Miyerkoles, Pebrero 3, 2021, sa kagamahan sa syudad sa Sugbo ang usa ka liquor ban. Ubos sa Executive Order (EO) No. 117 nga giluwatan ni Cebu City Mayor Edgardo Labella, gidili ang pag-inom sa mga ilimnong makahubog sa mga pampublikong lugar.
Gitahasan sa EO 117 ang kapulisan, militar ug mga opisyal sa barangay sa pagpatuman sa liquor ban. Ang maong EO nagdili sa mga establisimento sa pagbaligya ug pagsilbi og mga alcoholic drinks sa mga lugar nga magpundok ang mga tawo. Ang makalapas nga establisimento hayan marebokar ang business permit.
Ang si bisan kinsa, lakip na ang tag-iya ug mga manager sa mga hotels, resorts, restaurants, convenience stores, sari-sari stores ug ubang mga establisimento gidid-an sa pagsilbi og ilimnong makahubog sa bisan asang pagpangpublikong lugar sa syudad samtang ubos pa ang syudad sa bisan unsang matang sa community quarantine.
Unsa ang gitugotan?
Apan ang mga hotels, resorts ug ubang accommodation establishments gitugotan sa pagsilbi og ilimnong makahubog ngadto sa ilang mga in-house guests, ubos sa mga lagda sa Department of Tourism ug sa Department of Trade and Industry.
Ang mga grocery, sari-sari ug convenience stores gitugotan sa pagbaligya og mga ilimnong makahubog basta adto kini imnon sa balay sa nagpalit.
Gipatuman sa kagamhanan sa syudad sa Sugbo ang usa ka total liquor ban niadtong Marso 16, 2020, samtang ang syudad gibutang ubos sa general community quarantine (GCQ). Apan gilibkas kini niadtong Oktubre 202 pinaagi sa Executive Order No. 94, sa dihang ang syudad gibutang na ubos sa modified GCQ.
Gipatuman pagbalik ang liquor ban sugod kagahapon sa dihang nakatala ang Siyudad sa Sugbo og 142 ka mga bag-ong kaso sa Covid-19. Ang syudad adunay 1,613 ka mga active cases sa maong balatian sa pagsuwat ning lindog.
Nabantayan sa Emergency Operations Center (EOC) sa syudad nga nisaka ang mga kaso sa Covid-19 human sa mga holidays nga maoy hinungdan sa pagpundok-pundok sa katawhan alang sa mga selebrasyon.
Daghan usab nga mga establisimento nga nasakpang nakalapas o nisobra sa limitasyon nga gisitar sa Department of Trade and Industry sa pagsilbi og ilimnong makahubog. Ang pagpatuman sa liquor ban gitumong sa paglikay sa sa mga non-essential social gatherings sa pangpublikong lugar ug sa pagkatap sa coronavirus disease.
Maobserbahan man gud nga atol sa mga drinking spree, wa nay social distancing ug tangtangon ang mga face masks ug face shields. Bitaw, unsaon pag-inom kon dunay face mask ug face shield. Unsaon kusog man gyud manginom ang mga Pilipino.
Matod pa bitaw ni Alejandro Roces, “We Filipinos are mild drinkers. We drink only for three good reasons. We drink when we are sad. We drink when we are very happy. And we drink for any other reason.” (edbarrita@gmail.com)