MAAYONG adlaw na sab sa atong mga supersuki sa tanang dapit.
Atong gibalikan paghisgot niadtong milabay nga semana ang umaabot nga politika sa nasud sunod tuig, 2022, diin posible nga magkauban si Mayor Sara Duterte Carpio ug iyang amahan, President Rodrigo Duterte, sa duha ka pinakataas nga position sa gobyerno sa nasud, sumala ni Chief Presidential Legal Counsel Salvador Panelo.
Nabaniog sa tibuok nasud ang pamahayag ni Mayor Sara nga modagan lang siya kon ugaling moapil pagsuporta kaniya ang mga opposition, apan usa ka imposible ang iyang handom.
Dako'g kalainan ang politika sa atong nasud kon atong itandi sa politika sa Estados Unidos kay ang kaatbang sa bugnong lugaynon, mopahayag man dayon og suporta sa kandidato nga modaug kay kalamboan man sa katilingban ang ilang ginatan aw.
Sa atong nasud, ang maparot sa eleksiyon nga partido maningkamot man pagsabwag og problema aron mahimong babag ug bitaron paubos, imbis motabang sa kalampusan sa nakadaug tungod kay nagapatigbabaw man ang party o personal interest.
Kon dili na kapartido ang modaug sunod nga eleksiyon ug mapulihan ang naa sa puwesto, daghan sa mga proyekto nga gibuhosan og minilyon ka pesos nga pundo sa gobyerno ang mahimong "white elephant" kay dili na tiwason, dili na gamiton sa bag-ong administrasyon tungod ang kredito maadto man sa pangalan sa daan nang namuno sa proyekto.
Magbuhat na sab og bag-ong proyekto ang bag-ong administrasyon ug mahimo pang tinubdan sa kurapsiyon aron makabawi sa gasto sa eleksiyon.
Laing babag sa kalamboan mao ang pagsige og utingkay sa mga kalapasan nga nabuhat sa milabay nga namuno aron pasakaan og kaso.
Mga butang nga babag sa atong kalamboan nga dili ikalimud sa atong nasud.
Tuig 2034 pa kuno ang plano ni Mayor Sara nga modagan apan iya kahang talikdan ang yangungo sa katawhan nga padaganon siya sa 2022?
Ang pagka-pangulo sa usa ka nasud wala gitakda nga alang lang sa mga lalaki sama sa gibungat ni Presidente Digong nga dili angayan ang mga babaye sa mao nga position tungod sa matang sa buluhaton.
Apan kon ugaling gitakda si Mayor Sara nga maoy mosunod nga pangulo sa atong nasud, walay bisan kinsa nga arang makapugong.
Alang sa mga suporter ni Mayor Sara, wala sila naluya sa iyang pahayag ug padayon sila sa pag-ukoy sa katawhan sa tanang dapit aron iduso ang ilang kampanya pag-agni sa katawhan nganong gikinahanglan siya sa atong nasud sa sunod nga administrasyon.
Apan sa dagan sa atong panahon nga nia kita sa pandemya sa Covid-19, makakita pa kaha kita sa bagang panon sa katawhan nga magtapok panahon sa kampanya sa mga kandidato? Kana kon mahuman na ang krisis tungod sa virus ug kon wagtangon na ang pagpatuman sa social distancing.
Atong iapil sa atong mga pag-ampo nga unta mawala na ang Covid-19 kay kon magpabilin ang atong sitwasiyon, posible nga dakong panon sa katawhan nga gitaptapan ang nawong sa face mask ang atong masaksihan panahon sa kampanya alang sa eleksiyon.