MIDANGOP sa kapulisan sa San Pedro Police Station ang usa ka babaye nga online seller dihang gibandilyo siya sa ilang dapit nga duna siya'y katariki nga laing lalaki.
Miyerkules sa gabii, Pebrero 3, 2021, midangop aron magpa-blotter sa presinto dos si Merlyn (bansagon gitago), 31 anyos, nagpuyo sa Nograles, Barangay 76-A, Bucana, Davao City, dihang di na niya maantos ang tumang kauwaw.
Gisaysay ni Merlyn sa duty desk officer sa presinto dos nga usa sab kini sa hinungdan sa ilang punay'g away sa iyang bana.
Usa ka alyas Roger nga iyang silingan ang nanabi sa ilang mga silingan nga si Merlyn dunay katariki nga laing lalaki.
Nisamot ang kalagot ug kauwaw ni Merlyn dihang sa pag-kompronta niya kang Roger, mikalit kini'g tubag nga bisan kinsa na lang daw ang ka-sex niini.
Sa maong hitabo, daling midangop sa kapulisan ang babaye ug gimandoan siya nga idangop sa barangay level ang maong reklamo aron didto sila husayon.