Nagpaabot sa dakung kahinam ang mga American citizens niining buot ipalabang nga balaudnon ni US President Joe Biden nga magahin og $1.9 trillion alang i-ayuda sa ekonomiya ug sa American citizens nga na-apektuhan sa Covid. Ang problema kay gibabagan kini sa Republican party. Gidak-an ra sila sa maong kantidad kay diha na man silay napalabang nga $900 billion atol sa administrasyon ni Presidente Donald Trump nga gitawag og Coronavirus, Aid, Relief, and Economic Security (Cares) Act.
Kon dili magkasabot, mapasar gihapon kini kay bisan tabla ang gidaghanon sa mga senador, 50 ka Republicans ug 50 ka Democrats, si Bise Presidente Kamala Harris, nga maoy Senate President, ang mubo-ak sa tabla pabor unya sa maong Covid relief plan.
Niadtong miaging stimulus relief package nadawat sa US citizens, apil na ang mga balikbayan nga si Achilles “Tata” Tejero, Engr. Boy Capitan ug George Sanchez ang tag-$1,200 matag usa. Kining akong mga higala nagpaabot nga makadawat og dugang $1,400 matag usa, lain pa sa ilang dependents. Sumala ni Sanchez ug Tejero nga dili makapnan ang maong kantidad kay gikan kini direktamente sa US Treasury. Hayahay ang mga balikbayan nga nagbayad gihapon sa ilang buhis sa US kay makadawat sila linibong dolyar isip relief.
Mikomediya hinuon si Pat “Piskal” Navarro nga mas maayo dinhi sa Pilipinas kay bugas, sardinas ug bihon ang ipanghatag. Daghan hinuong reklamo nga kuwangan ang bugas nga gihatag sa ubang Mayor’s Information and Liaison Office (Milo). Gipanghimakak hinuon kini ni Milo chief Teofy Gutang sa Capitol Site, Cebu City, kay tinarong gyud kuno ang iyang pagpanghatag sa mga relief goods.
* * *
Ang usa ka grupo nga nagtawag sa ilang kaugalingon og People’s National Coalition for Revolutionary Government towards Federalism (PNC) nagtakda og duha ka adlaw, Pebrero 21–22 aron kuno ipabati nila ang singgit sa katawhan alang sa usa ka revolutionary government. Misaad sila nga mupapirma sa usa ka milyon ka mga tawo alang sa maong kawsa.
Dili lang ko mokomentaryo sa meritu sa maong isyu, ang ako lang nga wrong timing kining maong kalihukan kay nag-atubang pa kita niining pandemic. Kadudahan usab ang paglusad niini karon kay sunod tuig na himuon ang local ug national elections. Samtang adunay magduda nga tingalig sinugo kini sa Malacanang aron magpadayon sa pwesto si Presidente Duterte. Adunay mga nasubay sa batakang balaud nga pag-usab sa atong nga mao ang constitutional convention, constitutional assembly ug people’s initiative. Mas demokratiko kining paagi kaysa pugson nato ang katawhan sa pagsagop sa charter change tungod unya sa kahadlok kon ubos na sa revolunary government.