Gipasar sa konseho sa Syudad sa Sugbo ang usa ka resolusyon nga gipasaka ni Councilor Raymond Alvin Garcia atol sa ilang regular session niadtong Enero 20, 2021 nga nagtugot ni Mayor Edgardo Labella sa pakigsabot-sabot sa Land Bank of the Philippines aron maimpas ang utang sa South Road Properties (SRP).
Utang gikan sa Japan International Cooperation Agency (Jica) ang gigamit sa syudad sa pag-develop sa SRP. Ang utang nga 12.315 billion yen o tugbang sa P4.65 bilyones niadtong Marso 7, 1996 gipaagi sa Landbank isip conduit bank.
Nagbayad ang Siyudad sa interest ug principal niini matag tuig. Apan matod pa ni Garcia, duna pay nahabilin nga P1.5 bilyones sa maong utang. Unya makabayad niini ang Siyudad kay duna pay nahabilin nga P5.5 bilyones sa halin sa mga lote sa SRP.
* * *
Sa dihang si Vice Mayor Mike Rama pay mayor, ang Siyudad nibaligya niadtong 2015 og 45.5 ka ektaryang mga luna sa SRP sa kantidad nga P16.7 bilyones. Ang consortium sa Ayala Land, Cebu Holdings Inc. ug SM Prime Holdings nipalit og 26.3 ka ektaryang balor og P10.009 bilyones. Ang Filinvest Land Inc. nipalit og 19.2 ka ektaryang balor og P6.7 bilyones.
Ang mahitabo mao ang prepayment sa utang aron sayo kini nga maimpas. Matod pa ni Garcia, makadaginot ang Siyudad og labing menos P85 milyones kon bayran ang tanang utang sa SRP.
Dunay nay gigahin nga P371 milyones nga bayad sa SRP loan ubos sa 2021 annual budget sa Siyudad. Busa matod pa ni Garcia, P1.1 bilyones na lang ang kuwang aron maimpas ang utang sa SRP ug mahimo kini pinaagi sa usa ka supplemental budget.
* * *
Matod pa ni Garcia ang prepayment sa utang sa SRP usa sa mga paagi aron kamenusan ang gasto sa kagamhanan sa Siyudad. Bitaw, maayo nga dalion kini kay tingalig mahurot na og gasto ang halin sa SRP unya wa pa kabayri ang utang.
Tiaw mo sa halin nga P16.7 bilyones, P5.5 bilyones na lang ang nahabilin. Hain man kaha paingon ang P11.2 bilyones? Kon magasto na, lisod nang pangitaon. Maglisod man gani pag-liquidate ang Siyudad sa P3.5 bilyones nga anti-Covid-19 fund.
Ang resolusyon una pa lang nga lakang sa prepayment, matod ni Garcia. Kinahanglan pa kini og mga endorsement gikan sa Department of Finance, Bangko Sentral ng Pilipinas ug ubang mga ahensiya sa gobyerno. Maayo kay nasugdan na.