WA DAMHA sa kanhi sportswriter Lemuel Maglinte nga ang kalibutan sa mixed martial arts (MMA) nga iyang gisudlan hapit 12 ka mga tuig na ang nakalabay maoy magdala kaniya sa international tournament diin siya mismo ang mokombati.
Ang Sugbuanon nga jiujitsu practitioner bag-uhay lang nipakita sa iyang kahanas sa Las Vegas, Estados Unidos diin midaog siya og bronze medal sa 140-160 lbs. division sa Atlas Grappling Invitational-All Las Vegas Jiujitsu Tournament niadtong Enero 25, 2021.
Ang torneyo gipahigayon sa closed door sa Atlas grapping facility sa Henderson, Las Vegas tungod sa hulga sa pandemiya. Mao kini ang unang away ni Maglinte isip purple belt.
Sa interbyu sa Superbalita Cebu, si Maglinte niingon nga misulod siya sa martial arts tungod kay overweight siya sa tuig 2009 ug gusto niyang mausab ang iyang lifestyle.
Sa height nga 5’4, nagtimbang si Maglinte og 68 kilos niadtong 2009 maong nakahukom siya nga magsugod og healthy lifestyle.
Gikan sa hobby, nagseryuso na ang 32-anyos nga si Maglinte sa mixed martial arts.
Nagsugod si Maglinte sa iyang MMA career ubos sa Yaw-Yan ArDigma ni Master Benigno “Ekin” R. Caniga, Jr.
Human milapad ang iyang kaalam sa MMA, misulod siya sa Jiujitsu, usa ka martial art nga nakabasi sa grappling, ground fighting ug submission holds.
Sa iyang paglarga sa Estados Unidos niadtong sayong bahin sa 2020, nadiskobrehan ni Maglinte nga dako ang community sa jiujitsu sa Las Vegas ug adunay mga torneyo.
Nagbunga ang kakugi ni Maglinte sa dihang midaog siya og bronze medal sa Atlas Grappling Invitational-All Las Vegas Jiujitsu Tournament.
Ang maong kadaugon maoy nag-qualify niya sa mas dako nga torneyo—ang 2021 Jiujitsu World League karong Marso 27 sa Sahara Events Center, Las Vegas.
Mosalmot sab si Maglinte sa American Grappling Association Championship karon gihapong Marso.
Tambag ni Maglinte sa gustong mosulod sa MMA nga permentihon ang disiplina ug maningkamot lang.