ANG Cebu City Police Office ug Cebu Provincial Police Office (CPPO) nipahigayon og tree planting activities sa managlahing dapit niadtong Miyerkules, Pebrero 3, 2021 dungan kini nga kalihokan sa kapulisan tibuok sa nasod.
CCPO
Moabot ngadto sa 1,000 ka mga punoan sa kahoy ug mga prutas ang natanom sa CCPO sa bukirang dapit sa siyudad sa Sugbo.
Nanguna sa programa mao si Police Colonel Josefino Ligan, direktor sa CCPO, nga adunay tema nga “Ang pulis ay Makakalikasan.”
Matod ni Ligan nga mimando si PNP Chief General Debold Sinas sa tanang kapulisan lukop nasud nga mananom og daghang kahoy aron mapreserbar ang kalikupan.
Gikalipay usab ni Brgy. Kapitan Richard Adolfo sa Mabini nga maoy napilian sa CCPO nga tamnan sa mga punoan sa kahoy sanglit dako matod pa kinig ikatabang sa kalikupan.
“Dako kaayo ko’g pasalamat nga napili nila ang Barangay Mabini nga ari sila mag tree planting kay ako hilig sad ko og kahoy kay dako kaayo nig tabang sa Mabini ilabi na nga ang tubig nagkaus-os,” matod ni Adolfo.
Gipasalig ni Adolfo nga ilang atimanon ang maong mga punoan sa kahoy ug prutas nga gipangtanom sa mga pulis.
Adunay tawo ang kapitan nga moamuma niini hangtod nga motubo kini sulod sa taas nga katuigan.
Ang Police Regional Office (PRO 7 nag-target og 5,000 ka punoan sa kahoy ang ilang matanom ning buwana sa tanang police office sa Central Visayas.
CPPO
Kapulisan sa probinsiya sa Sugbo ug ang lokal nga kagamhanan sa Lungsod sa Tuburan nag-alayon sa kalihokan sa pagpananom og kahoy sa naasoy nga adlaw.
Si Police Colonel Aladdin Collado, direktor sa CPPO, maoy nangulo sa kalihokan.
Kaabag ang pipila ka mga ahensiya sa gobiyerno ug grupo sa kabatan-onan nga giumol sa PNP nga ilang katimbang usab kampanya batok sa gidiling drugas.
Usa sa mga kalihukan nga gihimo sa mga pulis sa probinsiya mao ang pagsanong sa awhag sa PNP chief sa paghatag og pagtagad sa kinaiyahan.
Kaabag usab ang Department of Environment and Natural Resources (DENR) 7 ug uban ang pipila ka mga nagpakabana nga grupo nga misalmot sa pagpananum og mga punoan sa pine trees.
Si Collado, sa iyang pamahayag atol sa mubo nga programa sa wa pa gihimo ang pagpananom, niingon nga usa kini nga pagpabana sa kapulisan sa kalikupan, dili lang sila alang sa pagmintinar sa kahusay ug kalinaw sa komundad.
Sa Tuburan moabot sa kapin sa 100 ka mga punoan nga pine trees ang gipangtisok sa bukirang barangay sa Kabangkalan.
Si Paquito Melicor Jr., Regional Director sa DENR-7, niingon nga ang ilang buhaatn maoy nihatag sa mga tanom nga pine trees.
Matod ni Melicor, ang pananom sama kini sa paghatag og bawos sa kahitas-an sa pagbuhat sa mga tanom nga kining mga gipangtanom mohulip sa mga gipangputol na,
Gipasabot sa direktor nga ang pagpananom usa ka paghandum nga sa paglabay sa panahon nga dunay makita sa umaabot. (AYB, BBT)