KANDING gigaid, gilabanan sa tag-iya, silingan iyang gipusil niadtong Miyerkules sa alas 6 sa gabii, Pebrero 3, 2021 sa Purok 2, Brgy. Langub, Lungsod sa Asturias, Sugbo.
Si Emmanuel Lacaba Gaviola, 56, ulitawo, mag-uuma, nakalingkawas sa kamatayon human nakalihay sa pagpusil ni Nestor Cambarijan Amaca, 49, minyo, panday.
Si Amaca nga nahinabi sa Superbalita Cebu nagkanayon nga iyang giadto sa balay si Gaviola gumikan sa iyang kanding.
Napungot siya dihang pagkuha niya sa iyang binuhi nga kanding, gigaid na kini sa punoan sa guyabano. Hugot ug mubo na kaayo ang pagkahigot, matod ni Amaca.
Wa niangkon si Gaviola ug iyang nasuta nga ang inahan niini nga si Fe maoy naggaid.
“Naluoy ko sa akong binuhing kanding. Bag-o pa nanganak, napasmo. Ilang gidagmalan, gipinapuok sa paghigot, di namakalihok nipilit sa punoan sa guyabano,” pasangil ni Amaca.
Gipadayag niya nga igo lang siya nga milaban sa iyang kanding, apan giingong giatake siya ni Gaviola ug mga kabanay nga giingong nagdalag sundang.
Gawas niini, gitabangan pa siyag mga bala sa tirador hinungdan sa iyang pagkabun-og.
Sa iyang kalagot, nikuha siyag armas sa ilang balay gibalikan niya si Gaviola. Apan dihang iyang gipusil, si Gaviola nakalihay ug nakadagan.
Si Amaca nakuhaag usa ka paltik nga .38 caliber snubnose revolver nga dunay tulo ka mga bala ug usa ka bala sa .357 caliber revolver.
Kasong kalapasan sa Republic Act (RA) 10591 kun illegal possession of firearm ug attempted murder ipasaka sa kapulisan batok kang Amaca. (GPL)