COTABATO CITY -- Duha ka giingong magsuong terorista ug bombers ang napatay sa mga awtoridad alas 11:15 sa buntag, Huwebes, Pebrero 4, 2021.
Giila ang mga nakabsan sa kinabuhi nga sila Rasul ug Bhadz Dubpaleg.
Matud ni Maguindanao Police Provincial Office Director Colonel Donald Madamba nga nadakpan ang mga suspek sa gilusad nga law enforcement operation sa kapulisan ug militar sa Rajah Buayan sa nahisgutang probinsiya.
Gisakay gilayon ang mga suspek sa police patrol car aron dalhon sa Maguindanao Police Provincial headquarters sa Shariff Aguak apan nangilog sila og armas ngadto sa mga pulis, hinungdan napugos sa pagpusil kanila.
Nadala pa ang mga suspek ngadto sa Maguindanao Provincial Hospital apan gideklara sa mga doktor nga dead on arrival human makaangkon og daghang samad pinusilan sa lawas.
Gikompirma ni PRO-BAR Regional Director Brigadier General Samuel Rodriguez nga ang mga suspek miyembro sa Dawlah Islamiya Hasan Group ug core members sa BIFF Karialan-Bungos Faction.
Nalambigit matud pa ang magsuon nga Dubpaleg sa nakalabay nga pagpamomba sa Isulan, Sultan Kudarat, Midsayap, North Cotabato ug Southseas Mall sa Cotabato City. (Edgar E. Fuerzas)