MOKABAT sa P839 mil ang kantidad sa nagkadaiyang druga nga nasakmit sa hiniusang puwersa sa awtoridad pinangunahan sa Philippine Drug Enforcement Agency (PDEA)-Davao batok sa duha ka gikonsiderang big-time drug pusher.
Arestado ang mag-ig-agaw nga sila alyas Chris ug alyas Ken, taga El Rio Vista Village, Bacaca Road, Barangay 19-B, Davao City, alas 6 sa gabii, Pebrero 4, 2021.
Nagkadaiyang druga ang nakuha sa posisyon sa mga dinakpan sama sa duha ka mga pack nga dunay unod nga 394 tablets nga gituohang pink ecstasy ug laing usa pa ka pack nga dunay unod nga 100 tablets, light brown nga gituohang ecstasy.
Sumala ni PDEA-Davao Director Antonio Rivera nga duna silay gipa-controlled delivery nga mga kinarton nga package sa post office.
Ang nasampit nga mga kontrabando daan nang na-detect sa Ninoy Aquino International Airport (NAIA) nga dunay kadudahang sulod apan nakalusot gihapon kini og naabot sa Davao City.
Gipahibalo sab sa post office nga duna pa'y susamang bagahe nga anaa kanila sa susama ang tag-iya, hinungdan nga naapil kini sa PDEA sa ilang operasyon.
Sa pag-deliver sa PDEA, human sa pag-detect sa mga K9 dogs, ang duha ka mga suspek ang midawat sa mga bagahe, apan gipasud-ong sila sa sulod niini, ug misugat kanila ang mga gituohang ecstasy.
Giingon ni Rivera nga ang ecstasy usa ka matang sa party drugs diin lakip sa mga nakumpiska gikan sud sa kontrabando mao ang duha ka pakite nga dunay timbang 1 gram mao ang ketamine, usa ka plastic sachet unod ang 0.5 gram nga unidentified brown substance, usa ka pakite unod ang 25 ka mga suspected LSD Lysergic Acid Diethylamide ug usa ka sachet unod ang dark brown cube nga gituohang marijuana hush.
Dugang sa director nga niadtong bulan sa Disyembre 2020, duna sab delivery ang maong mga suspek apan gamay lamang kini itandi karon.
Nasayran gikan sa director nga sagad mga parokyano sa mga suspek mao ang mga miyembro sa LGBT diin asa ilado na kaayo ang ngalan sa mga dinakpan.
Sa kasamtangan, giandam na ang kaso batok sa mga dinakpan didto sa korte.