Gitudlo nga housing chairman si Vice Pres. Leni Robredo apan wala magdugay gitaktak kay dili ikasinabot sa tigom sa kabinete. Nagsigig saway sa kampanya batok drugas maong gitudlo isip co-chair sa Inter-Agency Committee on Anti-Illegal Drugs (ICAD) apan gitangtang kay nagpakaulaw sa nasod. Misumbong hinuon sa US government ug UN Office on Drugs and Crime. Midiritso lang og grado nga hagbong si Pres. Rodrigo Duterte sa pakiggubat batok drugas. Anaa sa watch list si Robredo sa narco-politicians.
Ang taho nga gipagawas ni Robredo kinutlo lamang gikan sa kapulisan ug inay mangitag lakang unsaon pagsumpo. Sa PNP Drug Enforcement Group, adunay 3M drug users sa nasod nga makakonsumo og 156,000 kilo nga shabu matag tuig balig P1.3 trilion.Ang Philippine Drug Enforcement Agency (PDEA) nakasakmit og 3,182 kilo sa 2017-2019. Anti-Money Laundering Council nakasakmit og P1.4 billion drug money sa 2017-2019.
Sa taho sa US International Development, dunay 1.4M drug users ug pushers diin pipila ang misurender nga giubos sa rehabilitasyon pinasikad sa Comprehensive Dangerous Drugs Act (RA 9165). Sa pagpatuman sa RA 9165 miubos ang drug users, wala nay shabu laboratory human ilang gibungkag ang 14 ka laboratoryo ug gatosan ka drug den.
Gisaway sab ni Robredo ang Anti-Terrorism Law nga maghatag og dugang ngipon sa luag nga Human Security Act ug wala makadulot ang Anti-Subversion Law. Walay maayong sistema ang administrasyon pagtubag sa krisis nga gidalit sa Covid-19 ug manubag sa palusot sa Sinopharm-China vaccine. Palakaw nga asa ang Presidente sa bagyong ‘Rolly’ ug ‘Ulysses’ apan misimang ang balos sa kampo ni Duterte nga dunay gikarelasyon nga lalake si Robredo.
Si Robredo usa ka abogada ug social activist. Napiling kongresista sa Camarines Sur sa 2013. Sympathy votes ang nadag-an isip bise-presidente human sa kamatayon sa iyang kapikas DILG Sec. Jesse Robredo sa dihang giluwanang abyon mitiurok sa kabaybayonan sa Masbate sa 2016. Gipadayon ang damgo ni Jesse nga Ugnayan ng Barangay At Simbahan (UBAS). Nakigtambayayong sa non-government organizations (NGO) sa iyang panerbisyo ubos sa Angat Buhay Program. (csa_1156@yahoo.com / 0906-464-8954)