Kaniadtong human resource management officer (HRMO) pa ko sa usa ka ahensiya sa kagamhanan sa Rehiyon 7, sari-sari ang mga kinaiya ug personalidad sa mga empleyado nga akong nasugatan o nabangatan.
Dunay bagulbulan, tapulan, hangol, hambugero, tikasan, masupilon, mapahitas-on, hinawayon, agrisibo, ug sipat. Apan bisag daghan ni silang mga badlungon, duna say maihap nga mga sulundong mamumuo.
Dihay higayon nga naay niprotesta kay wa siya makuha sa mga nakadawat og awards ug promotion nga dugay naman kuno siya sa serbisyo.
Ako siyang gilingkuran pagpasabot nga wa lang magbasi ang awards and promotions committee sa gidugayon sa trabaho kundi apil ang kinaiya, inisyatibo, positibong pakig-relasyon ngadto sa mga kauban.
Ako siyang gitambagan nga di mag-apura sa posisyon nga gi-aying-ayingan kay kon ma promote man ugali, maayo apan kon di sab, okay lang kay di pa iyang panahon. Mas mahinumdoman ka sa imong kahibalo, katakos ug maayong binuhatan.
Ako siyang dugang gipasabot nga hinayhinay niyang palambuon iyang kaugalingon kay sa ngadto ngadto makit-an ra kini sa mga dagko. Padayon lang og trabaho bisag way nagtan-aw unya minusan ang pagkahinawayon ug estikadura. Dapat ang mga panghitabo sa opisina di dad-on sa balay o mga panghitabo sa balay di sab dad-on sa trabahoan.
Importante sab ang attendance. Paninguhaa nga di ma late unya mobiya sab sa insaktong oras. Ayaw pag- segi og palta kon malikayan. Ayaw pamalit og pagdayeg. Ang awards o promotions di kini pangayuon kundi ihatag niadtong angay nga makadawat. Kon sa English pa “awards are not asked, it is given to those who deserve it”.
Ipadayon ang pagkamapahiubsanon. Pasagdi nang uban nga magsegi og pa-impress kay sa ngadto-ngadto mahibaw-an ra gihapon ang tinu-oray nga kahibalo.
Trabaho lang ug padayon pagtabang sa uban para molambo ang inyong gitrabahoan. Unya ayaw pagdahom nga balusan ka sa imong kaayo o binuhatan. Unya kon naay motabang, ayaw hikawi sa imong pasalamat.